26 марта 2014 г.
"Çамрăксем _ сывă пурнăç йĕркишĕн" акципе килĕшỹллĕн Тутар Сăкăтĕнчи вăтам шкулта Т. Абянов физкультура учителĕ тата И. Мухутдинов фермер тăрăшнипе А. Шарафутдинов ятне асра тытса шашка-шахмат турнирĕ иртрĕ. Вăййа кăмăллакансене ял тăрăхĕн пуçлăхĕ Н. Хасянов, шкул директорĕн çумĕ Г. Сабитова, районти шашка-шахмат федерацийĕн президенчĕ Н. Федоров саламларĕç.
Агзаметдин Шейхутдинович нумай çул математика учителĕ пулса ĕçленĕ, спортăн çак енне аталантарас енĕпе сахал мар тăрăшнă. Ăна пула чылайăшĕ ăмăртусенче мала тухнă. Вăл _ мини-пекарня хута яраканĕ те.
Шашка-шахматла выляма юратакансен йышĕ ỹссех пырать. Ачасен ỹсĕмĕнче çакă та кирлех. Çĕнтерни çеç хавхалантармасть вăйăсенче, пĕр-пĕрин опытне вĕренни, курса калаçни мĕне тăрать! Турнира Вăрнар районĕн, Тутар Республикин хастарĕсем те хутшăнчĕç.
Шашкăлла выляса П. Иванов, Н. Федоров, А. Тинюков, шахматпа В. Суйманов, П. Иванов, В. Наумов малти вырăнсене тухрĕç. Икĕ енлĕ тупăшура П. Иванов, В. Наумов, Н. Федоров çĕнтерỹçĕсем пулчĕç.
Мала тухнисем грамотăсемпе парнесене тивĕçрĕç. Шкул ачисем вĕсене ташă-юрăпа савăнтарчĕç.
А. АБЯНОВА
Источник: "Авангард" (газета Батыревского района)