Публикации » Тивĕçĕсене чыслăн пурнăçлать

Районти шалти ĕçсен пайĕнче тĕрлĕ çулхи сотрудниксем ĕçлеççĕ. Вĕсем хушшинче çамрăксем те, пуян опытлисем те пур. И.Козлов (ÿкерчĕкре) йĕрке хуралĕнче ĕç стажне пуçлани вунă çула яхăн. Милици шкулĕнчен вĕренсе тухнă çамрăк специалист 2002 çулхи авăнăн 1-мĕшĕнче милици тумне тăхăннă. Ача чухнехи ĕмĕчĕ пурнăçа кĕнĕшĕн çав тери савăннă вăл. Кĕçĕн класра вĕреннĕ вăхăтрах Ильдус милици тумне тăхăннă аслă пиччĕшсем çине пĕр ăмсанса, пĕр тĕлĕнсе пăхнă. Пурте çирĕп характерлă пулни уйрăмах тĕлĕнтернĕ ăна. Йĕрке хуралĕнче çапла пулмалла та ĕнтĕ. Çавăнпа та Ильдус Хасиятуллович хăйĕн профессине чунтан парăнса пурнăçлас тесе пĕрремĕш кунтан пуçласах милицин чи паха енĕсене ăша хывнă. Паян вăл хăйĕн ĕçтешĕсем хушшинче тÿрĕ чунлăхпа, ĕçченлĕхпе, панă сăмаха тытма , пикеннĕ ĕçе вăхăтра вĕçне çитерме пĕлнипе палăрса тăрать. Ахальтен мар ĕнтĕ ăна 2007 çулта, Патăрьелĕнчи участок уполномоченнăйĕнче ĕçленĕ чухне, Хусан хули пин çул тултарнă ятпа йĕркеленĕ пысăк уявра обществăлла йĕркелĕхе сыхлас тĕлĕшпе хастарлăх кăтартнăшăн Диплом парса чыс тунă. Çак çулах вăл “Професси тĕлĕшпе чи лайăххи” ята та тивĕçнĕ. Ĕç папкинче ытти наградăсем те нумай.

Кăçал вара милици капитанĕн архивне тепĕр сумлă ят хушăнчĕ. Ĕçри професси ăсталăхне ÿстерсе пынине, творчествăри пултарулăхне кура районти шалти ĕçсен пайĕн çул çитмен ачасемпе ĕçлекен пай инспекторĕ Президент стипендине тивĕçнĕ.

Раççей космонавтикин çулталăкĕ Тутар Сăкăт хастарĕшĕн ăнăç-лă пуçланнă. Пуш уйăхĕн 5-мĕшĕнче стипендиат Хирти Пикшик чиперккипе çемье çавăрнă. Президент стипендийĕ çулталăка çеç, суйласа илнĕ мăшăр вара– ĕмĕрлĕхе. Çамрăк мăшăра телей те юрату çеç сунар.