30 января 2016 г.
Çак ыйту çине хурав тупас тĕллевпех Турханти тухтăр амбулаторийĕн çемье тухтăрĕ А. Кольцов хăйĕн пуçарăвĕпе пулас профессине суйласа илнĕ çамрăксем хушшинче сочинени конкурсне йĕркелеме шут тытнă. Теми пуриншĕн те пĕрешкел: "Мĕншĕн эпĕ тухтăр пуласшăн?". Тен, шурă халатлă хастар _ Анатолий Валентинович _ çĕкленĕ ыйтăвах малашне районти тĕп больницăри кадр ыйтăвне татса пама та пулăшĕ...
Конкурса хапăл тăвакансем хăйсен творчество ĕçне чăвашла та, вырăсла та, тутарла та çырса почта çыхăнăвĕ урлă тухтăр патне çитерме пултараççĕ. Ун пек чухне сочинени вĕçĕнче ятпа хушаматăра, адреспа телефон номерне çырма ан манăр. Компьютер вăйĕпе усă курса çырăва çак электрон адресĕпе вĕçтерме май пур: alkolc@mail.ru. Çивĕч шухăшлă ĕçсене районти тĕп больницăра пĕтĕмлетĕç. Çĕнĕ çулхи ырă кăмăллă Хĕл Мучи пиртен кайни пĕр уйăх çитет пулин те яваплă профессие суйласа илнине ĕненỹллĕ те ăста çутатнă каччăсемпе хĕрсене парнесем те кĕтеççĕ.
Источник: "Авангард" (газета Батыревского района)