14 февраля 2013 г.
Чăваш наци библиотекин «Кĕмĕл ĕмĕр» галерейинче «Туслăх асамат кĕперĕ» куçса çÿрекен курав уçăлчĕ. Чăваш Ен, Раççей тата Украина ÿнерçисен ĕçĕсенчен йĕркеленĕскере Чăваш профессионал ÿнер искусствин 100 çулхи юбилейне халалланă.
Çак пулăм Алексей Кокель ячĕпе çыхăннă. Вăл кам пулни пирки вулакана ăнлантарса пама кирлех те мар. Тĕнчипе палăрнă ентешĕмĕр чăваш профессионал искусствине пуçарса яраканĕ. Çав вăхăтрах унăн ячĕ Украинăпа та тачă çыхăннă, Харьковра ÿкерчĕкĕн академи шкулне никĕсленĕ.
Алексей Афанасьевич Чăваш Ене таврăнас ĕмĕтпе пурăннă. Шел, саманан саккăрла саламачĕ ăна çапла тума май паман. Акă халĕ тинех тăван çĕр-шывне килсе курма, тăванла икĕ халăха туслăхăн асамат кĕперĕпе çыхăнтарма май тупрĕ. Республикăра унăн ячĕпе Пĕтĕм тĕнчери пленэр улттăмĕш хут иртрĕ. Шăпах çав тапхăрта пурнăçланă ĕçсем вырăн тупнă та куравра.
Кокель ячĕллĕ пленэр Чăваш Енпе Украина художникĕсене çеç мар, Мордва, Удмурт, Тутарстан, Мускав, Питĕр, Воронеж, Красноярск тата ытти регионпа хула ÿнерçисене те çыхăнтарать. Унта паллă ăстасем - Раççей академийĕн чăн членĕ, Раççей халăх художникĕ Ревель Федоров, Украина халăх художникĕ, Украинăн Тарас Шевченко ячĕллĕ Наци премийĕн лауреачĕ Виктор Ковтун, Раççей ÿнер академийĕн член-корреспонденчĕ, Раççей тава тивĕçлĕ художникĕ Анатолий Рыбкин /Питĕр/, Украина тава тивĕçлĕ художникĕ Александр Чередниченко /Сумы/, Раççей тава тивĕçлĕ художникĕ, Тутарстан Патшалăх премийĕн лауреачĕ Зуфар Гимаев, ыттисем те - хутшăннă.
Куравпа паллашнă май тахçан маларах курнă ĕçсене тĕл пулатăп. Телее, Кокель ячĕллĕ пленэр кунĕсенче эпĕ те çитсе курнă Патăрьел районĕнчи Турхана, Чăваш Ишекне, Атăл леш енчи «Чăваш Ен» санаторие, вăл е ку картинăн эскизĕ мĕнле çуралнин кÿнтеленĕ пулнă. «Таня» произведениех илер. Виçĕ çулти шăпăрлан шăрăх çанталăка пăхмасăр ÿнерçĕ умĕнче питĕ тимлĕ ларчĕ. Александр Король ăна кайран шăккалатпа сăйларĕ. Акă халĕ пĕчĕк Таньăпа çĕнĕрен курнăçма, çав саманта аса илме питĕ кăмăллă. Зуфар Гимаев ÿкернĕ портретри Санюк аппапа та курнăçса калаçма тивнĕ. Викентий Лукияновăн пейзажĕсем яланхи пекех чуна çывăх.
Курава уçма ЧР Художниксен союзĕн председателĕ, Раççей халăх художникĕ Ревель Федоров, ЧР культура министрĕн çумĕ Татьяна Казакова, ЧР Патшалăх Канашĕн комитет пуçлăхĕ Петр Краснов, Патăрьел районĕнчи Турхан ял тăрăхĕн пуçлăхĕ Александр Сымов, ыттисем хутшăнчĕç, сăмах каларĕç. Алексей Кокель ячĕллĕ пленэр тата асăннă курав йĕркелÿçин Владимир Васильевăн ĕмĕт-шухăшĕ пысăк: çак ĕçсемпе Хусансене те, Мускавсене те паллаштарасшăн. Çапла пултăрччĕ. Туслăх асамат кĕперĕн вăйĕ ан иксĕлтĕр.
Источник: "Хыпар"