07 ноября 2012 г.
Ноябрĕн 2-мĕшĕнче Турханта çуралса ÿснĕ Герман Кокель епископа большевиксем персе вĕлернĕренпе 75 çул çитнине паллă туса, Патăрьелĕнчи чиркÿре Герман святитель ячĕпе уçнă кĕçĕн престол умĕнче литурги кĕлли иртрĕ. Ăна кăнтăр округĕн благочиннăйĕ Сергий атте ертсе пычĕ. Унпа пĕрле чиркÿре 9 священник кĕлĕ турĕ. Петр Федоров протоиерей пухăннисене таса пурнăçлă святой Герман епископăн асаплă пурнăçĕ, унăн пархатарлă кун-çулĕ çинчен каласа кăтартрĕ, Улатăрпа Чăваш çĕрĕн епископĕн Турă умĕнчи сăваплă ĕçне аса илчĕ.
Ун хыççăн Герман аттен турăшĕ умĕнче молебен кĕлли пулчĕ. Юлашкинчен пурте пĕрле чиркÿ тавра, кĕлĕсем юрласа хĕрес çулĕпе çаврăнчĕç, священниксем кĕл туса тасатнă шыв сапрĕç.
Çакăн пек чиркÿ кĕлли Кокель çуралнă Турхан ялĕнче те иртрĕ.
Источник: "Авангард" (газета Батыревского района)