01 августа 2012 г.
Ватăсем усал хыпар утпа çÿрет теççĕ. Тепĕр чухне унпа çеç килĕшес килмест. Ырри те çилçунат хăвăртлăхĕпех вĕçет. Çак кунсенче, акă, Упамсасем Трофимовсен савăнăçне пĕрле пайланă. Ун пек чухне вăл тата пысăкланать-çке! Сăлтавĕ вара ывăлĕпе, Мускаври çар чаçĕнче службăра тăракан Артемпа çыхăннă. Институтра пилĕк çул вĕренсе инженер специальноçне алла илнĕ каччă иртнĕ çулхи раштав уйăхĕнче ашшĕпе амăшĕнчен тăван çĕр-шыва чыслăн та хисеплĕн сыхлама пил илнĕ. Çичĕ уйăхра вăл салтак пăттин тутине те, унăн тарлă аттин шăршне те хăнăхрĕ-тĕр. Ку таранччен вăл хăйĕн тивĕçне чăнласах та тÿрĕ кăмăлпа пурнăçланă. Çакна вара ăна чун панă çынсем патне тав çырăвĕ çеç мар, пысăк наградăна ярса пани тепĕр хут çирĕплетрĕ. Артем Германовича служба ĕçĕнче паттăрла ĕç тунăшăн “За отличие в службе” паллăпа наградăланă. Герман Николаевичпа Светлана Николаевнăн хăйсен ывăлĕшĕн хĕпĕртемелĕх пур.
Источник: "Авангард" (газета Батыревского района)