06 марта 2010 г.
Пуш уйăхĕн 12-мĕшĕнче, эрнекун, Чăваш Республикин тĕп хулинче Шупашкарта “Mega Galaxy” канупа культура çуртĕнче 4-мĕш хут “Чăваш пики-2010” конкурс иртет.
Уява пурĕ 13 хĕр хутшăнать. Патăрьел район чысне А. Кудрявцева хÿтĕлет. Алина Тури Тăрмăш хĕрĕ, хальхи вăхăтра Шупашкарти Ф. Павлов ячĕллĕ музыка училищинче вĕренет.
Хутшăнакансем 17 çултан пуçласа 25 çулччен, чăвашла ирĕклĕ, таса калаçакан пикесем.
Ăмăрту тытăмне хĕрсем хăйсемпе паллаштарни тата халăх историне, йăли-йĕркине, пурнăçне пĕлнин шайне тĕрĕслемелли ăс-тăн конкурсĕсем кĕреççĕ. Унсăр пуçне чиперккесен хăйсен чăваш тумĕсене кăтартма тата пултарулăх конкурсĕ витĕр тухма тивĕ. Юлашкинчен хĕрсем жюри членĕсене хăйсем ăсталанă апат-çимĕçпе хăналĕç, мĕнле пĕçернин вăрттăнлăхĕсемпе паллаштарĕç.
“Чăваш пики-2010” титула çĕнсе илнĕ хĕр кăçал Пĕтĕм Раççейĕпе иртекен “Чăваш пики” конкурса хутшăнма тивĕç пулĕ.
Конкурса Культура министерстви пулăшнипе Чăваш наци конгресĕпе Чăваш Республикинчи çамрăксен “Хастар” пĕрлешĕвĕ ирттереççĕ.
Источник: "Авангард" (газета Батыревского района)