23 марта 2018 г.
Çак кунсенче Сăкăтри клуб заведующине Анатолий Калькина "Чăваш Республикин культурăн тава тивĕçлĕ ĕçченĕ" хисеплĕ ят пачĕç. Анатолий Алексеевич çак хисепе чăнахах та тивĕçлĕ, кĕçех 40 çул çитет вăл культура сферине ура ярса пусни. Сцена çинче юрлать те, ташлать те, купăс калать, тĕрлĕ роль калăплать, уявсем йĕркелет, чăн-чăн культура ĕçченĕ вăл.
1959 çулхи пуш уйăхĕн 29-мĕшĕнче Сăкăтра çуралнăскер, шкулта вĕреннĕ чухнех хăйĕн вăр-варлăхĕпе, артист пултарулăхĕпе палăрса тăнă. Çавăнпах ĕнтĕ аллине аттестат илсен Ульяновскинчи культурăпа çутĕç училищине хореографи уйрăмне вĕренме кĕрет. Дип ломлă каччă тăван района таврăнать. Ĕçе вырнаçнă хыççăнах çара каять. Унта вăл десантник пулнă, кунта та харсăрлăхĕпе палăрнă.
Çемьере ывăлсенчен кĕçĕнни пулнă май ялтах тĕпленет. Патăрьелĕнчи культура çурчĕн директорĕнче ĕçленĕ хыççăн, 1987 çултанпа Сăкăтри культура çурчĕн ертỹçинче вăй хурать. Анатолий Алексеевич ял халăхĕпе, çамрăксемпе пĕр чĕлхе тупма пултаракан çын. Çавăнпах клубра кружоксем ĕçлеççĕ, уяв семпе конкурссем, кану каçĕсем тăтăшах иртеççĕ.Анатолий Алексеевич тăрăшнипех Сăкăт хорĕн коллективĕ чылай çул халăх ятне хăйĕнчен вĕçертмест, пуканесен халăх театрĕ те республикăра лайăххисен шутĕнче, 2015 çултанпа кунта "Ман килес" эстрадăпа фольклор ушкăнĕ ĕçлет. Вăл та таврари ялсенче ят-сум çĕнсе илчĕ.
Анатолий Калькин районти юрăпа ташă ансамблĕн ташă ушкăнĕн хастарĕсенчен пĕри. Ансамбльпе вăл тĕрлĕ ялпа хулара халăха савăнтарать, сцена çинче çăмăллăн ташлаканскере пĕртте 60 çула çитекен арçын тесе калас килмест. Сăнĕпе те, ỹт-пỹ сийĕпе те çамрăк курăнать.
Анатолий Алексеевича ĕçре пулăшса пыракан мăшăрĕ, Елена Анатольевна та культура сферинче чылай çул тăрăшать, вĕсем хăйсемпе пĕрле Саша ывăлне те пĕр мероприятирен те хăвармаççĕ. Вăл та ашшĕ пекех десантник пулнă, районти юрăпа ташă ансамблĕнче ташлать, эстрадăпа кăсăкланать.
Н. ВАЗЮКОВА
Источник: "Авангард" (газета Батыревского района)