10 января 2018 г.
Сăкăтсем хăйсен ял çыннине, райбольницăра тухтăр пулса ĕçленĕ Николай Елкина асăнса кăçалхипе улттăмĕш хут волейбол турнирĕ йĕркелерĕç. Вăтам шкул спорт залĕнче сакăр команда тупăшрĕ мала тухассишĕн. Ăмăртăва хутшăнакансене район администрацийĕн пуçлăхĕн çумĕ, экономика, ял хуçалăх, çĕр тата пурлăх хутшăнăвĕсен пайĕн начальникĕ Л. Кузнецов, Сăкăт ял тăрăх пуçлăхĕ Л. Чернов, «Красное Знамя» хуçалăх ертÿçи П. Никифоров, Сăкăтри вăтам шкул директорĕ А. Падусев, район депутачĕсен Пухăвĕн депутачĕ Е. Мартышкин, Вăрнар район больницин тĕп врачĕ Н. Тинюков, спорт ветеранĕ И. Хитров, тăванĕсем çитĕнÿсем суннă май Николай Александровичăн кун-çулне аса илчĕç, çав вăхăтсене куç умне кăларчĕç.
Хĕрÿ кĕрешÿре куçса çÿрекен кубока Кивĕ Ахпÿртсем çĕнсе илчĕç. Сăкăтсем иккĕмĕш, Шăнкăртамсем виççĕмĕш вырăна тухрĕç.
Турнир тивĕçлĕ шайра ирттĕр тесе Николай Александровичăн çывăх тăванĕсем, тус-юлташĕ, пĕлĕшĕсем, кÿршисем тăрăшрĕç. Яланхи пекех тĕп спонсор «Мастер+» сервис центрĕ (ертÿçи Ю. Елкин, тăван шăллĕ) пулчĕ.
(Хамăр корр.)
Источник: "Авангард" (газета Батыревского района)