10 октября 2015 г.
Юлашки çулсенче районта çĕнĕрен куккурус акса ỹстерме пуçларĕç. Ку культурăна тепĕр хут çи- тĕнтерме пуçлаканнисенчен пĕрремĕш Сăкăтри "Красное знамя" ял хуçалăх производство кооперативĕ пулчĕ. Выльăх-чĕрлĕх отрасльне тимлĕх ытларах уйăрма тата кĕтĕве пысăклатма шухăшланăран çак утăма турĕç. Кăçал Сăкăтсем тата тепĕр çĕнĕлĕх кĕртрĕç: выльăхсен апат рационне пуянлатас тĕллевпе куккурус вăрлăхне çапса тĕшĕлерĕç. Ăна авăртса çитерме палăртаççĕ.
48 гектар йышăнакан вăрлăхлăх куккурус уйĕ халь пушаннă ĕнтĕ. Анчах çак кунсенче кăна-ха кунта ĕç шавĕ тăратчĕ. "Агрос-530" маркăллă комбайн мăнаçлăн çеç вăтам çынран çỹллĕрех çитĕннĕ культурăна выратчĕ.
_ Халĕччен куккурус вăррине пуçтарса курманнипе Вăрнар районĕнчи пĕр хуçалăхăн опычĕпе паллашма кайса килтĕмĕр. Унта вĕсем тахçантанпах ĕçлеççĕ-мĕн, комбайн çумне ятарлă агрегат вырнаçтарнă. Эпир кăçаллăха тырă выраканнипех усă курас терĕмĕр, _ пĕлтерчĕ Алексей Пайдютов механизатор.
"Красное знамя" хуçалăх малашлăхпа пурăнать, ял хуçалăхĕнче кашни отрасль пĕр-пĕринпе çыхăннине тĕпе хурать. Çавăнпах ĕнтĕ кунта пĕлтĕр çĕнĕ ĕне ферми хута ячĕç. Киввисене те юсасах тăраççĕ.
Районта пĕрчĕллĕ культурăсене те, çавăн пекех çĕр улмине те пуçтарса пĕтернĕ.
"Иккĕмĕш çăкăрăн" тухăçĕ пĕр гектартан вăтамран 196 центнерпа танлашнă.
39 гектарта çитĕннĕ пахча çимĕç уйĕ те пушаннă.
Кăçал районĕпе куккурус 782 гектар йышăннă, унтан 48-шĕ вăрлăх валли пулнă.
Траншейăсене куккурусран силос 8100 тонна хунă.
"Исток" агрофирмăра сахăр чĕкĕнтĕрĕ кăлараççĕ.
Тухăç малтанхи кăтартупа 250 центнерпа танлашать.
Тымар çимĕçе маларах килĕшсе татăлнă сахăр чĕкĕнтĕр завочĕсене ăсатаççĕ.
Источник: "Авангард" (газета Батыревского района)