26 сентября 2015 г.
Сăкăтра çуралса ỹснĕ Николай Толстов пĕчĕклех кĕвĕ тĕнчипе туслашнă. Хăйĕн ачалăхĕ пирки аса илнĕ чухне вăл акă мĕн каларĕ:
_ Манăн аннепе пĕр тăвансем пурте купăс калама пĕлнĕ. Кукка Тăван çĕршывăн Аслă вăрçине те баянпах кайнă, тет. Атте те çăвар купăсĕпе кĕвĕсем кăларатчĕ. Вĕсен ăсталăхĕ мана та куçнă. Шкула кайичченех чỹрече çине ларса купăс каланине ас тăватăп.
Н. Толстов ỹссе çитсен те хăйĕн пурнăçне кĕвĕ-çемĕпех çыхăнтарас тенĕ. Ятарлă пĕлỹ илнĕ хыççăн Николай Петрович направленипе "СССР халăх учителĕ" хисепе тивĕçнĕ П. Чернов директор ертсе пыракан Елчĕкри вăтам шкулта ачасене вĕрентме пуçлать. Петр Никифоровича вăл хăйĕн пурнăçĕн пĕрремĕш вĕрентекенĕ тесе хаклать. Тăрăшуллă çамрăк кỹршĕ районта ĕçленĕ чухнех район тата вĕрентỹ пайĕн Хисеп хучĕсене тивĕçет.
Ют тăрăхра мĕнле лайăх пулсан та тăван çĕр хăй патнеллех туртать çав. Çуралнă кĕтесре сывлăшĕ те уçăрах пек, шывĕ те тутлăрах пек... Çулталăк Елчĕк тăрăхĕнче тăрăшнă хыççăн Николай Петрович Патăрьелĕнчи иккĕмĕш вăтам шкулта вăй хума пуçлать. Çитĕнекен ăрăва кĕвве туйма, юрлама хăнăхтарать. Уроксене кăсăклă ирттерме тăрăшать, çĕнĕлĕхсем кĕртет. Гуманитари енĕпе вĕрентекен преподавательсемпе пĕрлештернĕ уроксем те _ рисованипе, вырăс литературипе, физикăпа _ час-часах йĕркелет. Вĕренекенсем музыка пур çĕрте те пулăшнине тепĕр хут ĕненеççĕ.
Николай Петрович тăрăшнипе ачасем çитĕнỹсем те тăваççĕ. 2011-2012 вĕренỹ çулĕсенче А. Ялукова, К. Логунова районта музыкăпа иртнĕ олимпиадăра иккĕмĕш тата виççĕмĕш вырăнсене йышăннă. 2013-мĕшĕнче А. Аппакова наукăпа практика конференцийĕнче иккĕмĕш тухнă. Пĕлтĕр А. Торговцев, А. Савдеров, Д. Тухфетуллов, Ю. Поляков республикăри "Уçă саслă ачалăх" конкурсран дипломант пулса таврăннă.
Вĕренекенĕсемпе пĕрлех Н. Толстов хăй те тĕрлĕ конкурса хутшăнать. 2014 çулта вăл физика учителĕсен "Физика урокĕ хальхи шкулсенче" республикăри XXV методика фестивалĕнче "Класс тулашĕнче пĕрлештесе йĕркеленĕ чи лайăх мероприяти" номинацинче лауреат пулнă. Районта çак ятпах йĕркеленĕ мероприятинче çĕнтернĕ. "Георги ленти" çарпа патриот юррисенчен республикăра иртнĕ фестивальтен, "Тăван тăрăх юррисем" юрлакан коллективсен конкурсĕнчен те пушă алăпа килмен.
Учитель хăйĕн опычĕпе те ыттисене час-часах паллаштарать. Кĕвве лайăх туякан ачасемпе урокра тата уроксем хыççăн мĕнле ĕçлени, классика çеммисене ăнланма вĕрентесси чылай учителе интереслентернĕ.
Николай Петровичсăр шкулти пĕр мероприяти те иртмест. Çĕнĕ çул е Мартăн 8-мĕшĕ, Çĕнтерỹ уявĕ е юлашки шăнкăрав _ музыкант баянпа юрлаттарать те, ташлаттарать те. Тăван ялĕнче те пушă тăмасть. Каçсерен ăна культура çуртĕнче курма пулать. 2007 çултанпа Н. Толстов Сăкăт халăх хорне ертсе пырать. Хор концерт программипе Мускавра, Шупашкарта, Чĕмпĕрте, республикăн тĕрлĕ кĕтесĕнче пулнă. Чăваш халăхне çутта кăларакан И. Яковлев çуралнăранпа 160 çул çитнине çĕршывăн "чĕринче" паллă тунă çĕре те хутшăннă, Тав çырăвĕпе таврăннă.
Тăрăшулăхне кура Н. Толстов Чăваш Республикин Патшалăх Канашĕн, районти вĕрентỹ пайĕн, район пуçлăхĕн, Патăрьел ял тăрăх администрацийĕн, Чăваш Республикинчи композиторсен ассоциацийĕн-пултарулăх союзĕн Хисеп грамотисене илме тивĕçнĕ.
О. ПАВЛОВА
Источник: "Авангард" (газета Батыревского района)