15 апреля 2015 г.
Районта "1941-1945 çулсенчи Тăван çĕршывăн Аслă вăрçинче çĕнтернĕренпе 70 çул" юбилей медалĕсемпе чысласси малалла пырать.
Район тата ял тăрăх ертỹçисем сывлăх хавшанине пула тухса çỹреймен вăрçă участникĕсемпе тыл ветеранĕсем патне килĕсене кайса çак медальпе чыслассине те йĕркеленĕ.
Çак кунсенче Сăкăт ял тăрăх пуçлăхĕ Сергей Толстов Анастасия Нрти, Вера Хитрова, Анисия Медведева тыл ветеранĕсен кăкăрĕсем çине тивĕçлĕ медальсене çакса ячĕ (ỹкерчĕкре).
Сергей Иосифович ветерансене саламланă май, вулавăшра вăрçăра пуçне хунă ентешĕмĕре П. И. Тинюкова халалланă куравпа та паллаштарчĕ, ун çинчен каласа пачĕ.
Чыслава пухăннисем вăрçă вăхăтĕнче 14-15 çулхи хĕрсем Улатăрта окоп чавнине, Канашра, Елчĕкре çул тунă çĕрте ĕçленине, вăрман каснине, выçăпа ура шыçăнни пирки куççуль витĕр аса илчĕç.
Çĕр çинче тек вăрçă нихăçан та ан пултăр терĕç.
Источник: "Авангард" (газета Батыревского района)