14 января 2015 г.
Сăкăтра Алексей Казачков ячĕпе йăлана кĕнĕ хоккей турнирĕ иртрĕ. Пиччĕшĕсемпе тăванĕсем пуçарнăскере район тата ял тăрăхĕн администрацийĕсен хỹтĕлевĕпе ăна пиллĕкмĕш çул йĕркелерĕç. Хисеплĕ педиатрăн ырă ĕçĕсемпе ячĕ халăхра яланах асра. Сăмах май çакна та палăртмалла: пĕлекенсемшĕн, çывăх çыннисемшĕн ялти вăтам шкул директорĕнче ĕçленĕ Игорь Медведев тата тĕп больницăн врач-инфекционисчĕ пулнă Николай Елкин тата ыттисен пурнăçĕпе ĕçĕ-хĕлĕ те манăçмасть. Вĕсен ячĕпе те тĕрлĕ енлĕ ăмăртусем иртеççĕ. Турнирсене вара ял тăрăхĕнче пурăнакансем çеç мар, ыттисем те хастар хутшăнаççĕ.
Хоккей вăййине килĕштерекенсем йышлăн. Пăр çинче ярăнма кăмăллакансене район администраци пуçлăхĕ Н. Глухов, Чăваш Республикин Патшалăх Канашĕн депутачĕ, "Красное знамя" ял хуçалăх кооперативĕн председателĕ П. Никифоров, район Пухăвĕн депутачĕ В. Глухов, ял тăрăхĕн пуçлăхĕ С. Толстов саламларĕç.
Тĕл пулăва Сăкăт тата Тутар Сăкăт ял тăрăхĕсен командисем тухрĕç. Ентешне асра тытса Н. Глухов та пăр çине тăчĕ, "Чи лайăх хỹтĕлевçĕ" номинаци çĕнтерỹçи пулчĕ. "Чи лайăх вратарь" ята вара Алексей Петрович шăллĕ _ Анатолий Казачков тивĕçрĕ. Турнир Тутар Сăкăт ял тăрăхĕн команди çĕнтернипе вĕçленчĕ
А. ИВАНОВА
Источник: "Авангард" (газета Батыревского района)