06 февраля 2018 г.
Çак кунсенче Çĕнĕ Шупашкарти "Химик" культура керменĕнче "Çĕнĕ Шупашкар - халăхсен тата культурăсен пĕрлĕхĕн хули" фестиваль иртнĕ. Анлă мероприятие пирĕн районти Шăхачри "Умарина" фольклор ушкăнĕ те хутшăннă. Фестивальте кулинари, алă ĕçĕсен куравĕсене те йĕркеленĕ. Пухăннисем фойере вырăс халăх тумĕсен выставкипе те хапăлласах паллашнă. Уява пухăннисене ЧР сывлăх министрĕ В. Вик- торов, ЧР Патшалăх Канашĕн депутачĕсем В. Рафинов, С. Михеев, Ю. Зорин, Чăваш Енри хĕрарăмсен союзĕн председателĕ А. Федорова, союзăн Ыр кăмăллăх фончĕн попечительсен Канашĕн председателĕ Л. Игнатьева, Çĕнĕ Шупашкар хулин тата администрацийĕн пуçлăхĕсем О. Матвеевпа О.Чепрасова саламланă.
Фестивальте пысăк хастарлăх кăтартнăшăн, наци культурипе йăли-йĕркине тытса пынăшăн "Умарина" фольклор ансамблĕн ертỹçине Николай Стефейкина тата Шăхач ял тăрăх пуçлăхне Иван Васильева хула администрацийĕн Тав çырăвне парса чыс тунă. Сăмах май каласан, асăннă ансамбль пĕлтĕр Чĕмпĕрте, Тутар Республикинчи Çĕпрел районĕнче иртнĕ фестивальсенче те хăйĕн пултарулăхне кăтартнă.
Источник: "Авангард" (газета Батыревского района)