Публикации » Патăрьел районĕ

07 июня 2019 г.

Аслă Арапуç вăтам шкулĕн хоккей курупкине тума Тимченко фондĕнчен нухрат уйăрĕç. «Ырă пăр» Тимченко фончĕн эксперт канашĕн ларăвĕнче палăртнипе килĕшуллĕн çĕршыври 11 регионти ача-пăча хоккейне аталантарма 14 проект грант пулăшăвне тивĕçĕ. Экспертсем 22 регионти 65 проекта пăхса тухнă. Грантсен конкурсне пĕчĕк хуласемпе ялсенче ача-пăча хоккейне аталантарма хатĕр, пултаруллă та пуçаруллă çынсене пулăшас тĕллевпе 2013 çултанпа ирттереççĕ. «Кăçал эпир ялсенчен проектсем ытларах йышăнтăмăр. Вĕсене авторсем тĕплĕ хатĕрленĕ, - палăртнă Тимченко фончĕн генеральнăй директорĕн çумĕ Игорь Барадачев. - Нумайăшĕ хоккей секцине аталантарасшăн, йывăр лару-тăрăва лекнĕ ачасене социаллă пулăшу парасшăн, физкультурăпа тата спортпа туслаштарасшăн». Патăрьел районĕнчен кăçал «Пирĕн картиш команди» проект тăратнă. Унпа килĕшуллĕн Аслă Арапуç вăтам шкулĕ çумĕнче 1 миллион та 800 пин тенкĕлĕх хоккей курупки тума тĕв тунă. Çав шутран Тимченко фондĕнчен 1 миллион та 246 пин тенкĕ уйăрĕç.

Источник: "Хыпар"