15 февраля 2019 г.
Первомайскинчи культура çурчĕн спорт залĕнче Чăваш Республикин физкультурăпа спортăн тава тивĕçлĕ ĕçченĕн, Чăваш Республикин тава тивĕçлĕ тренерĕн, Раççей спорт мастерĕн Владимир Семеновăн парнисене çĕнсе илессишĕн ирĕклĕ майпа кĕрешес енĕпе йăлана кĕнĕ турнирĕ иртрĕ.
Çулленех пухăнаççĕ тупăшăва çакăнта. Кăçал та сиктермерĕç. Чăваш Енри тĕрлĕ район, Тутар, Мордва Республикисенчи, Ульяновск, Иваново облаçĕсенчи спортсменсем килме кăмăл турĕç.
Ăмăртăва хутшăнакансене район администрацийĕн пуçлăхĕ Р. Селиванов, республикăри вĕрентỹ институчĕн ректорĕ Ю. Исаев, Первомайски ял тăрăхĕн пуçлăхĕ С. Никитин тата ыттисем саламларĕç.
Спортсменсем тĕрлĕ виçе категорийĕнче тупăшрĕç. Çамрăксенчен Кĕçĕн Арапуçĕнчи А. Чашкин 74 килограмлисемпе кĕрешсе пĕрремĕш вырăн çĕнсе илме пултарчĕ. 70 килограмлисене парăнтарса Первомайскинчи Д. Федоров пĕрремĕш, Пăлаçи Атăкри Н. Мыловпа Пăлапуç Пашьелĕнчи А. Терентьев виççĕмĕш вырăна тухрĕç. 48 килограмлă виçере Люляри Е. Смирнов çĕнтерỹçĕ пулчĕ. Анат Чакăри Д. Шуряков виççĕмĕш вырăн йышăнчĕ. Ишлĕри М. Ерофеевăн (55 кг) виççĕмĕш вырăнпа çырлахма тиврĕ.
Çĕнтерỹçĕсене дипломсем, медальсем тата асăнмалăх парнесем парса хавхалантарчĕç.
Вулакана пĕлме
Владимир Семенов ирĕклĕ майпа кĕрешес енĕпе малтанхи çитĕнỹсене М. Зейнетдинов тренер пулăшнипе Первомайскинчи вăтам шкулта вĕреннĕ чухнех тунă. Ертсе пырас ăсталăхĕ те çамрăклах çуралнă. Ирĕклĕ майпа кĕрешекенсен командин капитанĕ пулнă. Пурнăçăн малашлăх тĕшшине те çакăнпа çыхăнтарнă. 30 çул тренерта ĕçлесе 40 Раççей спорт мастерне хатĕрленĕ.
Чăваш ял хуçалăх институтĕнче вĕреннĕ. 1982-1983 çулсенче "Урожай" спорт обществин (Шупашкарти) ачасемпе çамрăксен шкулĕнче тренер-преподавательте ĕçленĕ. 1983-1988 çулсенче ирĕклĕ тата тутарла-пушкăртла кĕрешме хăнăхтарас енĕпе аслă тренерта тăрăшнă, 2010 çултан олимп резервĕсен спорт шкулĕн тренер-преподавателĕнче ĕçлет. 1995 çултанпа Чăваш Республикинчи ирĕклĕ майпа кĕрешекенсен федерацийĕн вице-президенчĕ. Тĕрлĕ ăмăрту ирттерес енĕпе пуçаруçă та вăл. Владимир Михайлович çавăн пекех Шупашкарти Патăрьел район ентешлĕхĕн ертỹçи те.
Ентеш турнирне йăлана кĕртессине вара ял халăхĕ мала хурать. Кăçалхипе вăл 18-мĕш хут пулчĕ.
А. ИВАНОВА
Источник: "Авангард" (газета Батыревского района)