24 апреля 2018 г.
Апрелĕн 14-20-мĕшĕсенче Ульяновск хулинче физкультура предмечĕпе шкул ачисен Пĕтĕм Раççейри олимпиади иртрĕ. Унта регионсенчен 200 ытла вĕренекен хутшăнчĕ. Чăваш Республикин чысне хỹтĕлекенсем хушшинче Первомайскинчи вăтам шкулти Анастасия Романова, Никита Кузнецов, Светлана Алексеева (пурте 11 класра пĕлỹ пухаççĕ) тата Максим Молочников (9) пулчĕç.
Вĕсем 5 енлĕ тĕрĕслев витĕр тухрĕç. Малтанах ачасен теори пĕлĕвне тĕрĕслерĕç. Физкультурăпа спорт историне, предмета лайăх пĕлни курăнчĕ. Кунти тупăшăва кайма вĕсем В. Матюшкин вĕрентекенпе сахал мар хатĕрленни сая каймарĕ.
Чăрмавсен полосине те çăмăллăнах каçрĕç. Баскетбол, футбол, флорбол (хоккейăн вăйлă аталанса пыракан пĕр енлĕ спорчĕ), теннис, гимнастика вăййисенче маçтăрлăх кăтартрĕç.
Призерсен шутне Никита Кузнецовпа Анастасия Романова кĕчĕç. Никита пĕлтĕр те призерсен шутне лекнĕччĕ. Çĕнтерỹçĕ пулма вĕсен пĕр балл çеç çитеймерĕ.
А. ИВАНОВА
Источник: "Авангард" (газета Батыревского района)