04 июля 2017 г.
Ялти чи таса та сăваплă вырăнсенчен пĕри масар шутланать. Унта пирĕнтен уйрăлса кайнă çынсем ĕмĕрлĕх вырăн тупнă. Ăна тирпейлĕ тытса тăрасси _ кашни çыннăн тивĕçĕ. Сител ялĕнче масар хапхине çĕнетес ыйту тахçантанпах тăратчĕ. Анчах темшĕн çак ĕç вырăнтан хускаласшăн пулмарĕ. Ку хутĕнче вара пуçаруçăсем пулчĕçех. Ял тăрăхĕн депутачĕ Ю. Степанов ăстаçăпа калаçу хускатрĕ. В. Марлынов сăмаха çирĕп тытрĕ. Палăртнă куна хапхана туса вырăна илсе килсех пачĕ. Ял халăхĕ те айккине юлмарĕ. Р. Мясников тимĕр юпасемпе тивĕçтерчĕ. Г. Хомуткинпа А. Васильев сварка ĕçне пуçăнчĕç. Ял тăрăхĕн депутачĕ Ю. Прискин та тăрăшулăх кăтартрĕ.
Сител халăхĕпе çĕршывăн тĕрлĕ кĕтессине саланнă ентешĕмĕрсенчен кĕнĕ нухратпа тунă эрешлĕ хапха типтерлĕн те илемлĕн курăнать халĕ. Пĕччен сурсан типсе пырать, ушкăн сурсан кỹлĕ пулать, тенĕ. Юрий Николаевич алли çăмăл пулчех иккен.
Д. ВЫРОСОВ, районти депутатсен Пухăвĕн депутачĕ
Источник: "Авангард" (газета Батыревского района)