14 февраля 2017 г.
Первомайски ялĕнчи культура çуртĕнче ирĕклĕ майпа кĕрешес енĕпе йăлана кĕнĕ республикăри XVI-мĕш турнир иртрĕ. Унта 1997-2002 çулсенче çуралнă арçын ачасем ЧР тава тивĕçлĕ тренерĕн В. Семеновăн парнисене çĕнсе илессишĕн ăмăртрĕç. Турнира чылай район тата Чĕмпĕр облаçĕн спорт- сменĕсем хутшăнчĕç.
Уява район администраци пуçлăхĕ Р. Селиванов уçрĕ. Рудольф Васильевич Чăваш Республикин тава тивĕçлĕ тренерĕ М. Зейнетдинов çамрăкранах хатĕр-ленĕ Люля ялĕнче çуралса ỹснĕ Алексей Смирнова "Раççей спорт мастерĕ" ята тивĕçнĕ удостоверени пачĕ, значокне çактарчĕ.
Ял тăрăхĕн ертỹçи С. Никитин ăмăртăва хутшăнакансене ăнăçу сунчĕ.
Турнира районти ачасемпе çамрăксен спорт шкулĕн тата филиалĕн кĕрешекенĕсем йышлăн хутшăнчĕç. Хăйсен виçе ушкăнĕсенче М. Молочников, Н. Мылов, Н. Шайдуков (Первомайскинчи вăтам шкул), А. Чаш- кин (Хирти Пикшикри вăтам шкул), Д. Трофимов, Я. Логинов, А. Реймов, Е. Чернов (Хирти Пикшик) А. Кушников, А. Чиркин, А. Муллин (Сăкăтри вăтам шкул), Шамильпа Камиль Вахитовсем, Д. Хромов малти вырăнсене çĕнсе илчĕç.
Очкосен хисепĕпе шутланă тăрăх, спорт шкулĕн команди ыттисене кая хăварса пĕрремĕш вырăна тухса кубока тивĕçрĕ. Çĕнтерỹçĕсене тата призерсене дипломсемпе медальсем парса хавхалантарчĕç. Çакна палăртмалла: ăмăртăва çамрăксене А. Клементьев, Чăваш Республикин тава тивĕçлĕ тренерĕ А. Ка- малетдинов, В. Анюров, В. Спиридонов, И. Вахитов тренерсем хатĕрленĕ.
М. ХАБИБУЛЛОВ
Источник: "Авангард" (газета Батыревского района)