25 ноября 2016 г.
Пỹртлĕре пурăнакан Н. Трофимова Первомайскинчи ветеринари лечебницинче 20 çул вăй хурать. Маларах "Ударник" колхозра ферма ертỹçинче, осеменаторта, выльăх тухтăрĕнче ĕçленĕ. Надежда Геннадьевна хăйĕн профессине питĕ юратать, çавăнпах "Первомайск", "Малалла" ял хуçалăх предприятийĕсенчи, уйрăм хуçалăхсенчи çынсен выльăхĕсем чирлесен талăкăн хăть хăш вăхăтĕнче те пулăшу пама васкать. Тĕрлĕ амакран профилактика мероприятийĕсене те тума ĕлкĕрет.
Вăр-вар та матур хĕрарăм мăшăрĕпе, Петр Ивановичпа икĕ хĕр пăхса ỹстернĕ. Вĕсем кукаçи-кукамай ятне те илтнĕ.
Н. Трофимова хăйне шаннă тивĕçе тỹрĕ кăмăлпа пурнăçланăшăн кăçалхи ял хуçалăх ĕçченĕсен кунĕнче Раççей Федерацийĕн Ял хуçалăх министерствин Тав çырăвне илме тивĕçрĕ. Çак хисеплĕ хута ăна Чăваш Республикин Патшалăх Канашĕн Председателĕн çумĕ С. Павлов пачĕ.
Источник: "Авангард" (газета Батыревского района)