05 апреля 2016 г.
2001 çулхи апрелĕн 27-мĕшĕнче мана "Ударник" хуçалăхăн ертỹçи пулма пĕр саслăн пулса суйларĕç. Ун чухне унăн парăмĕ 4 млн та 850 пин тенкĕччĕ.
Акана тухмалла, анчах вăрлăх та, çунтармалли-сĕрмелли материал та çук, техника та йĕркеллĕ çỹремест. Йывăрлăхсене пăхмасăрах 950 гектара акса хăвартăмăр: кишĕр, сухан вăрлăхĕ, сахăр кăшманĕ, çĕр улми.
Фермăра та лару-тăру начарччĕ: сăвакан 16 ĕне, 17 сысна, 12 лаша. Кĕске хушăра мăйракаллă шултра выльăхсен шутне 127 çитертĕмĕр. Вите тăррине юсарăмăр, никĕсне çĕнетрĕмĕр. Анчах хуçалăхăн парăмĕсене пула суд приста- вĕсем ĕнесене йăлтах арестлерĕç.
Каярах халăхпа калаçса пухура тулли мар яваплă "Сидели" пĕрлешỹ туса хутăмăр. Предприяти паян та ĕçлет. 2010 çулта виçĕ кĕлете, пилорамăна, лаша витине, армана юсарăмăр. Сысна фермин тăррине, гараж алăкĕсене çĕнетме вăй çитертĕмĕр. 2013 çулта 1780 тĕп пан улми лартрăмăр. Паян та халăхпа килĕштерсе ĕçлетпĕр.
Кăçалхи мартăн 7-мĕшĕнче çĕр пайĕсен хуçисен пухăвĕ иртрĕ. Первомайски ял тăрă- хĕнче çĕрсене регистрацилекен сахал. Пухăва хутшăнакан çамрăксем нумайăшĕ сыпса килнĕччĕ, чĕлхисене ирĕке ярса çеç ларчĕç. Çĕр ĕçне ăнланманнисем, хăйсен ятне варалама ĕлкĕрнисемех сассисене хăпартрĕç. Вĕсенчен пĕрне хуçалăхри ĕнесене, сурăхсене сутнăшăн ĕçрен кăларнăччĕ. Тепри вара тырă никамран ыйтмасăр турттарса аннă. Виççĕмĕшĕ инвалидсен ячĕпе виçĕ гектар çĕр илнĕ. Унта нимле стройка та тума юраманнине пĕлсе тăрсах икĕ хуралтă хăпартрĕ.
Халь çак çынсем "Сидели" пĕрлешỹ çĕнетсе хута янă çуртсене илессишĕн талпăнаççĕ. Анчах ман малашне те хуралтăсем пĕрлешỹрех тăрса юласса ĕненес килет. Мĕншĕн тесен халăх та хуçалăха шанать, çакна çынсем çĕр пайĕн свидетельствине пани те çи- рĕплетет.
А. ИВАНОВ, тулли мар яваплă "Сидели" пĕрлешỹ директорĕ
Источник: "Авангард" (газета Батыревского района)