18 марта 2016 г.
Чылай чухне темшĕн халăхра йĕрке хуралĕнче тăрăшакан сотрудниксем ĕç тивĕçне тỹрĕ кăмăлпа пурнăçланине усаллăхпа çыхăнтараççĕ. Ара, вĕсем пурте медработниксем Гиппократ тупине йышăннă пекех кулленхи ĕçре саккуна пăхăнса тимлекенскерсем-çке. Вĕсем те ялан усал мар, савăк кăмăллă та, ырă чунлă та пулаççĕ. Акă, çак кунсенче çеç район хаçачĕн "Ахрăм" "агентствине" Сителĕнче пурăнакан Михаилпа Галина Козловсем шăпах район полицийĕн оперативлă дежурнăй помощникĕ М. Уруков ячĕпе тав сăмахне çитерчĕç. Арăмĕпе упăшки Каçал тăрăхĕнчи Юнтапаран каçа юлса çуран утнă-мĕн. Тĕттĕм те сулхăн çанталăкра çамрăках мар çынсене çухрăм хыççăн çухрăм хыçа хăварма çăмăлах пулман, паллах. Çирĕм çул ытла йĕрке хуралĕнче ĕçлесе ят-сум çĕнсе илнĕ прапорщикăн пурнăçĕнче кун пек тĕслĕхсем пайтах пулнă-тăр. Çула май полици машини палламанскерсене чарса лартса кайнине Козловсем те йывăр вăхăтра пакунлисем алă тăсса панипех çыхăнтараççĕ.
Источник: "Авангард" (газета Батыревского района)