Публикации » Пĕр ял тăрăхĕнчен – виçĕ стипендиат!

2002 çултанпа Чăваш Енĕн матур та пултаруллă çамрăкĕсене республика Пуçлăхĕн стипендине парса хавхалантараççĕ. Кăçал ăна пирĕн районти 23 хĕрпе яш илме тивĕçрĕç. Вĕсенчен виççĕшĕ Первомайски ял тăрăхĕнчен.

Ял тăрăх администрацийĕн специалисчĕ Е. Шашкина. Вăл таврари ялсенчи хĕрсемпе каччăсене пĕрлештерсе тăракан канашра 2007 çултанпа тăрăшать. Елена ялта ирттерекен мероприятисене кăна мар, район, республика шайĕнчи спорт ăмăртăвĕсене хутшăнать, час-часах малти вырăнсене йышăнать.

– Пур çĕре те ĕлкĕрме, обществăлла ĕçсене хутшăнма мана мăшăр ăнланни, çемье пулăшса пыни хавхалантарать, – тет стипендиат.

Пĕлтĕр вăл çамрăксемпе ĕçлекен центр йĕркеленĕ конкурсра муниципаллă службăра вăй хуракансем хушшинче “Чи лайăххи” ята тивĕçрĕ.

Н. Секретов мĕн пĕчĕкрен спортпа туслă. Халĕ те çак ырă йăлана манăçа кăлармасть. Шăл тухтăрĕн профессине алла илнĕ яш çар тивĕçне пурнăçланă хыççăн урăх çĕре каяс темен, тăван тăрăхах килнĕ те. Кзыл Чишмари çемье офисне ĕçе вырнаçнă. Пушă вăхăчĕ сахалтарах пулин те ăна мероприятисенче час-часах курма пулать, ыттисене те явăçтарать.

Иртнĕ çул районти тĕп больницăна тин çеç алла диплом илнĕ специалистсем нумайăн килчĕç. Çакна шута илсе яш-кĕрĕм интересĕсене хÿтĕлес тата районта, республикăра иртекен конкурссене, ăмăртусене хутшăнтарас тĕллевпе çамрăксен канашне йĕркелерĕç. Унăн ертÿçи пулма Николая шанчĕç.

Ĕнерхи студентсем пур çĕре те ĕлкĕрме тăрăшаççĕ. Футболла выляса, йĕлтĕрпе ярăнса сывлăхĕсене çирĕплетеççĕ.

Н. Секретова ĕçтешĕсем те, пациентсем те хисеплеççĕ. Шăл тухтăрĕ чирлĕ çынсене эмелпе çеç мар, ăшă сăмахпа та сиплет.

Йĕпреç районĕнче республика ша-йĕнче ирттернĕ “Ту хуçи” конкурсра районăн пĕрлештернĕ команди пĕрремĕш вырăна тухрĕ. Çакăнта Николайăн тÿпи те пысăк.

Асăннă фестивальте команда капитанĕсем çÿллĕ ту çине чупса хăпарассипе ăмăртрĕç. Пирĕн А. Верликов кунта чи маттурри, чи правурри пулчĕ. “Ту хуçи” ята çĕнсе илчĕ. Алексей кăçал ЧР Пуçлăхĕн стипендине тивĕçрĕ. Стипендиат Первомайскинчи Митта Ваçлейĕ ячĕллĕ вăтам шкулта вĕренет. Унăн ятне республикăри чылай çамрăк спортсмен пĕлет. Вăл çуран чупассипе яланах малти вырăнсене йышăнать.