31 октября 2015 г.
Хура кĕркунне çывхарса çитнĕ май хирсем те пушанчĕç. Трактор, комбайн сасси вăхăтлăха шăпланчĕ. Кĕрхи сухана та вĕçленĕпе пĕрех. Çĕр вăй илсе канать. Ял çынни те хăйĕн ĕçне пĕтĕмлетме пултарать.
Районти "Первомайск" ял хуçалăх предприятийĕ тăрăшуллисен йышĕнче. М. Петров ертỹçĕ хуçалăха çирĕп алăра тытса пырать. Кашни çулах вĕсем пысăк тухăç туса илме тăрăшаççĕ. Кăçал та акă, пỹлмесем тĕш-тырăпа тулнă, выльăх апатне те хĕл каçмалăх çителĕклех хатĕрленĕ. Çĕр улмине те пухса кĕртнĕ. Первомайскисен пĕрчĕллĕ культура 580 гектарта çитĕннĕ, пĕр гектартан вăтамран 22,5 центнер тухнă. Чи пысăк тухăç кĕрхи туллăн пулнă _ 27,3 центнерпа танлашнă. Ырашăн та пĕчĕк мар: 27,2 центнер. Çĕр улмине 40 гектартан пуçтарса тирпейленĕ.
Паллах, çакă ĕç çынни вăхăтра тар тăкмасăр, тăрăшмасăр пулман. А. Арбузов комбайнерпа унăн пулăшаканĕ В. Лукьянов яланах малтисен ретĕнче. Акнă çĕрте В. Горшков, улăм купалакансем В. Никитинпа В. Леонов яланах пуçаруллă та матур. Фермăра выльăхсене апат паракан В. Арбузовпа сенаж çулакан С. Гаврилов тăрăшуллисен шутĕнче.
_ Хальхи вăхăтра фермăна выльăхсем валли апат турттараççĕ. Кĕрхи суха ĕçĕсене вĕçлесе пыраççĕ, _ пĕтĕмлетрĕ калаçăва "Первомайск" ял хуçалăх предприятийĕн тĕп агрономĕ В. Анисимов.
О. ВЕРЛИКОВА
Источник: "Авангард" (газета Батыревского района)