Публикации » Тăрăшни хăйсемшĕн

Республика шайĕнчи черетлĕ ăмăртуран çĕнтерÿпе таврăнчĕç Первомайски тăрăхĕнчи ачасем. Акă, И. Горшков 74 килограмлă виçере кĕрешсе пĕрремĕш, Н. Маркиданов, Н. Мылов, Д. Клементьев, В. Ендеев сахалрах виçесемпе вăй виçсе иккĕмĕшпе виççĕмĕш вырăнсене çĕнсе илчĕç. Çакă А. Клементьев тренера савăнтармаллипех савăнтарчĕ. Тренировкăсене çÿреме пуçлани нумаях та мар-çке ачасен!

Каншелĕнчи кивĕ шкул столовăйне суйласа илчĕç каччăсем кĕрешме вĕренме çÿреме. Çак ĕçре çитĕнекен ăру ыйтăвне татса пама район депутачĕсен Пухăвĕн председателĕ М. Петров, Чăваш Патшалăх Канашĕн депутачĕ О. Мешков, А. Власовпа В. Семенов тава тивĕçлĕ тренерсем нумай пулăшрĕç. Паян кунта кĕме те кăмăллă. Тренировкăсен пĕрремĕш çимĕçне пуçтарма та пулать.

Эрнере 3 хутчен ирттерет занятисене А. Клементьев тренер. Хăй те Чăваш патшалăх педагогика университечĕн физкультура факультетĕнче пĕлÿ пухнăскер вĕрентÿ методикине пĕлет. Паянхи кун икĕ ушкăна 27 ача çÿрет. Ытларах 5-7 классенче вĕренекенсем ÿркенмеççĕ.

– Кĕрешме вĕренме çÿрекенсене ашшĕ-амăшĕ те хирĕçлемест. Тĕлсĕр-палсăр çапкаланса çÿрени мар-çке. Ушкăнпа ырă ĕçе те явăçаççĕ вĕсем. Сăмахран, маларахри çулсенче çырмасене хăрăк-туратран тасатнăччĕ, стадионсене тирпейленĕччĕ. Пурăнакан тавралăха мĕншĕн тирпейлĕ тытас мар! Халĕ хамăрăн ятарлă вырăн пур. Унта тренировкăсем тумалли кирлĕ хатĕрсене хамăр вăйпах ăсталарăмăр,– каласа парать Александр Николаевич.

Тренировкăсене 7-8 ялтан çÿреççĕ. Ытларахăшĕ – Каншелĕнчен. Первомайскинчен, Кĕçĕн Арапуçĕнчен, Пÿртлĕрен, Йÿç Шăхалĕнчен. Анат Тăрмăшĕнчен килекен те пур.

Гаврилов генерал парнисемшĕн пынă ăмăртура та çĕнтерÿçĕсен йышĕнче пулнăччĕ Патăрьелсем. М. Зейнетдинов, А. Камалетдинов тренерсен ученикĕсем те савăнтарнăччĕ ун чухне. Аслисенчен ĕç мелне вĕренсе пымалли пур-ха А. Клементьевăн. Пĕрле ĕçлекен “Паттăр” физкультурăпа спорт комплексĕн ытти тренерĕсенчен канаш ыйтмалли те сахал мар. Вĕсемпе пĕр чĕлхере пулса ĕçлеме тăрăшать те ĕнтĕ çамрăк.

“Кĕрешме вĕренме çÿрени килĕшет пире. Спорт – сывлăх çăл куçĕ. Тренировкăсенче ÿт-пĕве пиçĕхтерни малашнехи пурнăçра пулăшать. Тăрăшни хамăршăнах. Эпир – çĕр-шывăн пулас хÿтĕлевçисем-çке”, – теççĕ кĕрешÿçĕсем. Çĕнтерÿ пьедесталĕ çине малашне те çине-çинех хăпарса пымалла пултăрах эппин вĕсен.