16 мая 2015 г.
Кăçал çуркунне ир килмерĕ пулсан та çĕрпỹ аван тухнипе çĕр лайăх тата хăвăрт пиçсе çитрĕ. Çавна май ял ĕçченĕн кашни сехетпе туллин усă курма тивет. _ Кăçал пирĕн пĕрчĕллĕ тата пăрçа йышши культурăсем 600 гектар йышăнмалла, унтан кĕрхисем 126 гектарта ỹсеççĕ. Сăмах май, вĕсем пирĕн лайăх хĕл каçнă. Çурхисене вара 474 гектар никĕсе хывма планланăччĕ _ ĕçе вĕçленĕпе пĕрех. Халь механизаторсем _ Виталий Горшковпа Александр Арбузов _ сĕлĕ акаççĕ, вĕсене Андрей Исмуков, Степан Лысков, Иван Смирновпа Юрий Карлинов сеяльщиксем пулăшаççĕ, _ тесе пĕлтерчĕ "Первомайск" ял хуçалăх предприятийĕн тĕп агрономĕ Владимир Анисимов.
Пĕрчĕллĕ культурăсене икĕ тракторпа акаççĕ. Вĕсен хуçисем яваплă тапхăра нумай çул хутшăннăран опычĕсем те пысăк. Механизаторсене тата пулăшаканĕсене медицина тĕрĕслевĕ витĕр кăларнă.
Кĕркунне кĕлет туласси вăрлăх пахалăхĕнчен нумай килет, çавăнпах хуçалăхра ăна çĕнетсех тăраççĕ. Çуркунне "Малалла" ял хуçалăх эртелĕнчен сĕллĕн "рысак" сортне 6 тонна тата çурхи туллăн "симбирцид" сортне туяннă. Пулас тухăçăн "амăшне" имçамласах никĕсе хываççĕ. Кайран калчасене апатлантарма палăртнă.
30 гектар йышăнакан çĕр улми ани те майĕпен тулса пырать. Сăмах май, "иккĕмĕш çăкăр" вăрлăхне те улăштарнă. "Малалла" ял хуçалăх эртелĕнчен "рябинушка" тата "невский" сортсене туяннă. Чир-чĕртен тата колорадо нăрринчен хỹтĕлесе вĕсене "престиж" преппаратпа варăнтараççĕ. В. Леонов механизатор тата Н. Макаровпа И. Смирнов сеяльщиксем хăйсене шаннă тивĕçе тỹрĕ кăмăлпа пурнăçлаççĕ.
Хуçалăхра кĕрхи культурăсене тата нумай çул ỹсекен курăксене технологине пăхăнса нỹр тытса хăварнă. Ю. Савин тракорист ДТ-150 хурçă "утпа" акмалли-лартмалли лаптăксене культиваци тунă.
О. ПАВЛОВА
Источник: "Авангард" (газета Батыревского района)