08 ноября 2014 г.
_ Хăш-пĕр почтальонкăсем кунне вуншар çухрăм та утаççĕ. Кашни çырăнтару тапхăрĕнчех ĕçĕ кăткăс вĕсен. Умри тĕллевсене пурнăçламалла, ăнлантару ĕçне анлăн туса пымалла. Халиччен хамăр тивĕçе йĕркеллех туса пыраканччĕ-ха, _ тет Первомайскинчи çыхăну уйрăмĕн ертỹçи В. Кондратьева.
Ĕçре Г. Лапшина, Г. Ильметова, Т. Петухова правур та хастар. Хаçат-журнал çырăнтарассипе те, вĕсене вулакансем патне вăхăтра çитерессипе те кăтартуллă ĕçлеççĕ. Пенси панă кунсенче вара тепрер сумка тавар йăтса каяççĕ. Ватă çынсене супăньне, кĕпе çумалли порошокне, чей заваркине, канфет-печенине килĕсенех çитерсе параççĕ. Мĕн кирли пурте пур çыхăну уйрăмĕнче. Хĕвел çаврăнăш çăвне, шăши мурне, вырăн таврашне илсе килме ыйтаççĕ. Л. Лисицына йышра çĕнĕ çын. Вăл та ыттисенчен юласшăн мар. Р. Чернован ĕç стажĕ тепĕр икĕ уйăхран чĕрĕк ĕмĕр пулать. Тивĕçлĕ канăва тухасси те инçе юлман Раиса Ивановнан. Килĕштерет хăйĕн ĕçне. Анчах кĕрлĕ-çурлă çанталăкра кашни кил умне кĕрсе пылчăк çăрса çỹресси кансĕртереххине те пытармасть.
Кунсем кĕскелчĕç. Вăхăта пĕр сехет каярах куçарни тавралăха тата та часрах каç сĕмĕ çапма пулăшать. Ял-ял урлă тулли сумкăпа çỹреме меллех мар çав ĕнтĕ. Кашни çынна хăш тавар кирлине, кам мĕнле хаçат-журнал кăмăлланине пĕлни ĕçре чылай çăмăллăх кỹнипе савăнать.
_ Çак кунсенче акă М. Ильин, В. Елова, Л. Федорова çемйисем 5-6шар экземпляр хаçат-журнал çырăнчĕç. Килĕрен пĕрер илсе тăрсан та çырăнтарăва çăмăллăнах ирттерме пулать те вĕт,_ тет Р. Чернова почтальонка. Вăл çỹрекен Каншел, Пăлаçи Атăк ялĕсенче районта тухса тăракан "Авангард" хаçата кăмăллаççĕ-ха. Республикăри пĕр хаçата пурĕ те 8 экземпляр çырăннă пулсан, районăнне вара 115 çемье вулать.
А. АСТРАХАНЦЕВА
Источник: "Авангард" (газета Батыревского района)