22 января 2014 г.
Тухăç мĕнле пуласси вăрлăх пахалăхĕнчен нумай килнине Первомайскинчи "Первомайск" ял хуçалăх предприятинче яланах тĕпе хураççĕ. Çавăнпах çулленех ăна кирлĕ пек тасатса тирпейлеççĕ, çĕнетсе те тăраççĕ. Çуркуннеччен вăхăчĕ самаях пулин те хуçалăхра халĕ пикенсех тыр-пула аллаççĕ. 40 тонна тулă акма юрăхлă. Паян вăй хуракансем 90 тонна урпана кондицие лартассишĕн тимлеççĕ.
_ Çанталăк ăшă тăнипе усă курса вăрлăхсене аллама пуçларăмăр. Урпана паян-ыран тасатса пĕтеретпĕр, ун хыççăн сĕлле сортировка машини витĕр кăларма пуçлатпăр. Техникăна И. Удалов пăхса тăрать, хăйех кăлтăксене сирет. Хуçалăх ĕçне О. Ратников, Н. Крячко, Р. Волкова, Г. Маркиданова, Л. Шайдукова, Л. Протасова, В. Албутов куллен хутшăнаççĕ, хăйсене шаннă тивĕçе чунтан пурнăçлаççĕ, _ пĕлтерет И. Киргизов тĕп агроном.
Аслă Арапуçсем ĕне-выльăх каяшне те сая ямаççĕ, ăна пĕр çĕре купаласа хураççĕ. Çĕрнĕ хыççăн тăпра пулăхлăхне лайăхлатма хирсене тăкаççĕ. Кун пирки "Шыгырданы" предприятипе килĕшỹ тунă.
О. ПАВЛОВА
Источник: "Авангард" (газета Батыревского района)