28 августа 2013 г.
"Первомайск" ял хуçалăх предприятийĕнче кĕрхи культурăсене акма пуçăннă. Ăна 200 гектартан кая мар никĕсе хывса хăварма палăртнă.
-Кăçал кĕрхисем тухăçпа савăнтараймарĕç. Тулă пĕр гектартан вăтамран - 17, ыраш 19 центнер тухрĕ. Вăхăтра нỹр пулманни аванах ура хучĕ. Пирĕн тăрăхра çумăр ака вĕçленсен майăн 12-мĕшĕнче çунăччĕ, ун хыççăн июнĕн 19-мĕшĕнче, 20 тата 22-мĕшĕсенче тин кăштах ỹккелерĕ. Анчах вăл та тăпрана кирлĕ пек витереймерĕ. Çитес кĕркунне кĕлет туллирех пуласса шанатпăр, - тет хуçалăхăн тĕн агрономĕ И. Киргизов.
Иван Александрович 30-мĕш çул вырма ирттерет, пĕри те пĕр пек килменнине палăртать. Сăмах май, çĕр хуçин пĕр ырă йăла пур: вăй хума пуçланăранпах куллен мĕн ĕçлени, хăçан хăш культурăна акма е вырма тухни, çанталăк еплерех пулни пирки çырса пырать. Вăл 10, 20 çул каяллахи кашни кун пирки каласа пама пултарать. Хирте трактор сасси инçетренех илтĕнет. Сеялка кăкарнă хурçă "ут" васкамасăр çеç тырра тăпра ăшне хывать. Кĕрхисене акма хуçалăхри чи опытлă трактористсенчен пĕрне - В. Горшкова _-шаннă. Хальлĕхе 80 гектарта ĕçе вĕçленĕ.
- Тухăç вăрлăх пахалăхĕнчен нумай килет, çавăнпа та эпир ăна çĕнетсех тăратпăр. Вăрлăх туса илессипе ĕçлекен "Малалла" эртелтен "антарас" ыраш тата "миронская - 88" тулă туянтăмăр, - тет И. Киргизов акнине пăхнă май. Йĕтем çинче те шав тăрать. Пĕрчĕллĕ культурăсене тỹрех алласа вăрлăх валли уйăрса пыраççĕ. Хиртен пуçтарса кĕртнĕ сухан-севока та ятарлă бригада тасатса тирпейлет.
О. ПАВЛОВА
Источник: "Авангард" (газета Батыревского района)