11 июня 2013 г.
Ачисен çитĕнĕвĕсемшĕн чи малтанах ашшĕ-амăшĕ хĕпĕртет.
Первомайскинче пурăнакан Алексей Пантелеймоновичпа Надежда Александровна Емельяновсен те пепкисемшĕн пичĕсене хĕретмелле мар. Вĕсем виçĕ ывăла кун çути парнеленĕ, пурне те тивĕçлĕ воспитани пама тăрăшнă. Иккĕшĕ пурнăç çулĕ çине тухнă, кĕçĕнни Митта Ваçлейĕ ячĕллĕ Первомайскинчи вăтам шкулта пĕлỹ пухать. Дима Шупашкарти кооператив институчĕн экономика управленийĕн факультетне хĕрлĕ дипломпа пĕтернĕ.
Аслă пĕлỹллине çирĕплетекен диплома илнĕ хыççăнах çамрăк каччă Тăван çĕр-шыва сыхлама кайнă. Сывлăх енчен тĕреклĕ яш Тольяттинчи сывлăшпа десант çарне лекнĕ (ỹкерчĕкре). Кунта та вăл хăйне лайăх енчен çеç кăтартнă.
Çакна нумай пулмасть ашшĕпе амăшĕ ячĕпе 21208 çар чаçĕн командирĕн тивĕçĕсене пурнăçлакан А. Омаров подполковник янă Тав çырăвĕ те çирĕплетет. Унта Дима таса чунлă, дисциплинăна пăхăнакан салтак пулнине, çар хатĕрĕсемпе пĕлсе усă курнине, ĕçлĕхлине, командирсемпе юлташĕсем хушшинче хисеп çĕнсе илнине пĕлтернĕ.
Иккĕмĕш ывăлĕ Денис та тетĕшĕнчен юлмасть. Вăл пĕлтĕр шкултан ылтăн медальпе вĕренсе тухнă. Халь Санкт-Петербургри фармоакадеминче ăс пухать.
О. ПАВЛОВА.
Источник: "Авангард" (газета Батыревского района)