05 июня 2013 г.
- Хĕвел хыр тăррине хăпарчĕ. Пирĕн ĕç вĕçленмен-ха, - терĕ Первомайскинчи ветеринари участокĕн заведующийĕ Н. Трофимова пĕрле ĕçлекенсене. - Çапах кăштах канмалла-тăр.
Иртенпех ура çинче тăракан çын ывăнатех ĕнтĕ. Паян ялти килти хуçалăхра тытакан ĕнесенчен юн илчĕç. Йышĕ сахал мар. Ытти ялсенче çак ĕçе эрне пуçламăшĕнче тунăччĕ. Улттăшĕнче çичĕ кĕтỹ йĕркеленĕ. Вĕсене 500 ытла ĕне тухать.
Ĕçе пуçăниччен килтине те тирпейленĕ-çке. Ĕнене суса кĕтĕве янă. Лашине çерем çине кăкарнă. Виçĕ вăкăрне кăнтăрлаччен кавлемелĕх апат хурса панă. Сысна амисен ай сарăмне тасатнă. Çурисен умне витаминлă çăнăх хунă, валашкасене шыв янă. Сурăхĕсем те кĕтĕвĕпех. Ăратлăскерсем çулталăкне пĕрер çеç пăрламаççĕ, виçшер-тăватшар путек тăваççĕ. Çамрăкраххисене çерем çине кăларма иртерех. Хăнăхнă ĕçсем хăй еккипех пыраççĕ. Анчах пурне те вăхăтра тумалла. Сунă сĕте тỹрех хатĕрлевçĕсене тухса памалла, икĕ е виçĕ кун усраймастăн.
- Пĕччен мар. Мăшăрăмпа пĕрле ĕçлетпĕр. Ĕç уйăрса тăрасси çук. Паллах, ир тăма тивет. Ир тăракан кайăк тутă пулнă теççĕ. Эпир те çавах,_-тет кăмăллăн Надежда Геннадьевна. Пỹртлĕ ялĕнчен Трофимовсем - иккĕшĕ те Первомайскине ĕçе çỹреççĕ. Кунĕ те çынсеннипе пĕрешкел мар вĕсен. Петр Иванович вăтам шкулта автобус водителĕ пулса ĕçлет. Урок лариччен темиçе ялтан ачасене вĕренỹ çуртне çитермелле. Надежда Геннадьевнан та çавах. Пĕрлех вăл "Первомайск" хуçалăхра тĕп зоотехник тивĕçĕсене те илсе пырать.
-Хамăрта вĕресе тăран вăй-хала туятпăр-ха. Çавăнпа выльăх-чĕрлĕх-не те килте çителĕклĕ тытма тăрăшатпăр,- теççĕ Трофимовсем. Çителĕклĕ тенипе вара килĕшесех те килмест. Ытлă-çитлĕ темелле. Çавăн чухлĕ выльăха тăрантармалăх апат хатĕрлеме чылай пилĕк авмалла-çке. Вăхăтран-вăхăта йăхтармалла. Çамрăк выльăхсене пăхма татах та тимлĕх кирлĕ.
-Хăнăхнă ĕнтĕ,- тет Надежда Геннадьевна. - Сысна амине çурисенчен уйăрнă хыççăн 7 кун хушшинче аçа патне илсе каймалла. Çак вăхăта ирттерсен уйăх ытла кĕтес пулать. Ăна усăсăр тăрантарса тăрас килмест.
Тăрăшуллă ĕç тупăш та кĕртет. Çавăнпа та кăмăллă мăшăр. Ял хуçалăх предприятийĕсенче сыснасен усси çукрах тесе çирĕплетме пăхаççĕ. Çакă тĕрĕсех те мар. Трофимовсемех темиçешер ама çăвăрлаттарса сутаççĕ. Усси хăйсемшĕн çеç мар-çке. Çамрăк выльăхсене туянакан йышлă. Çывăхра пулмасан ăçтан кайса илмелле-ха вĕсене?
Çĕрпе ĕçлес тесен те, выльăх-чĕрлĕх ĕрчетес тесен те нумай пĕлмелле. Кашни ĕçĕн хăйĕн технологийĕ. Çакăнта вара Н. Трофимована вĕрентме кирлĕ мар. Маларах вăл Улатăрти совхоз-техникумра зоотехник пĕлĕвне илнĕ. Унтан ял хуçалăх академийĕнче вĕреннĕ. Ветеринари пĕлĕвĕ те пур унăн. Квалификацине ỹстерме вара тĕрлĕ курса çỹренĕ. Ĕç вырăнне улăштарса тăрасси те çук унăн. 24 çул такăрлатать Пỹртлĕ кинĕ ветеринари участокне. Ĕçе çуран, велосипедпа, автомашинăпа, кирлех пулсан, лашапа каясси те пулать. Кĕрлĕ-çурлă е çил-тăманлă каçсенче кỹршĕ яла çуран тухса килейместĕн. Пăрлама аптранă ĕнене пулăшу кирлех. Е килти хуçалăхри выльăхсем чирлеççĕ. Хăш-пĕр чухне сиплев курсне эрнешер тума тивет.
Улми йывăççинчен аякка ỹкмест теççĕ. Трофимофсен хĕрĕсем те çавах. Иккĕшĕ те вăтам шкул хыççăн пĕлĕве малалла тăсма Чăваш патшалăх университетне суйласа илнĕ. Светлана экономика факультутĕнчен хĕрлĕ дипломпа вĕренсе тухнă, Первомайски ялне качча тухнă, ашшĕпе амăшне мăнук парнеленĕ. Наташа та çав факультетрах муниципалитет служащийĕ пулма вĕренет.
А. КАПИТОНОВА.
Источник: "Авангард" (газета Батыревского района)