25 мая 2013 г.
Çак тĕллеве тĕпе хума тăрăшаççĕ "Первомайск" ял хуçалăх ĕçченĕсем. Çавăнпа сăвакан ĕнесене хире кăларнă. Ỹсĕм вара куç умĕнчех. 4-5 кунтах сăвăма 9-тан 14-15 килограма çитернĕ.
- Халĕ ĕнесене пĕр çул ỹсекен курăк ани çинче çỹрететпĕр. Кунти лаптăк пĕтсен нумай çул ỹсекенни çине куçатпăр, - каласа парать хуçалăх зоотехникĕ Н. Трофимова.
Ирхи сăвăма вĕçленĕ О. Шайдукова, А. Жирнова, Г. Капралова, О. Орман дояркăсем сунă ĕнесене пĕрин хыççăн теприне кăкаркăçран вĕçертсе картишне кăларчĕç. Кунта вара выльăхсене кĕтỹçсем кĕтсех тăраççĕ. Курăк ани те фермăран инçех мар. Ĕнесене малтанхи кунсенче çеç илсе тухма кансĕртерех. Халĕ хăнăхса пыраççĕ. Пĕрин хыççăн тепри уялла васкаççĕ вĕсем.
-Мăйракаллă шултра выльăх 322 пуç. Вĕсенчен сăвăнаканни - 110. Кĕтĕве çĕнетес тĕлĕшпе куллен ĕçлетпĕр. Комсомольски районĕнчен ăратлă 15 пушмак пăру туяннăччĕ. Тăххăрăшĕ пăрларĕç, халĕ 18-20-шер килограмм сĕт антараççĕ,- тет Г. Капралова ферма заведующийĕ.
Йыша ỹстерес тĕлĕшпе вырăнта та ĕçлеççĕ. Иртнĕ çул кашни 100 ĕнерен 99 пăру илнĕ кунта. Çамрăк выльăха пурне те сывă та тĕреклĕ ỹстерсе çитĕнтерме тăрăшаççĕ. Выльăхсене кĕтĕве кăлариччен юнĕсене тĕрĕсленĕ, профилактика сиплевĕсене тунă.
-Шыв проблеми те çук,- теççĕ кĕтỹçсем. - Ăна тракторпа турттарса килсе валашкасене яраççĕ. Ирпе пĕр вăхăт пуç çĕклеми çинĕ выльăхсем выртса канаççĕ. Витере пăчăхса тăни, йĕпе хăма çинче выртни мар. Уçă сывлăшĕ çеç мĕне тăрать! Малашне кункăра çине те ешĕл апат хурса парасшăн. Курăк ытти çĕрте те çитĕннĕ. Сĕте сивĕтеççĕ, пĕрремĕш сортпа çеç ăсатаççĕ.
Сăвăма ỹстермелли майсем çителĕклĕ. Вĕсемпе туллин усă курма çеç тăрăшмалла.
А. АСТРАХАНЦЕВА.
Источник: "Авангард" (газета Батыревского района)