17 августа 2018 г.
Августăн 7-10-мĕшĕсенче Чăваш Енре велоспорт ăмăртăвĕсем (ỹкерчĕкре) иртрĕç. Республика чемпионатне велосипед енĕпе СССР спорт мастерне, ветерансем хушшинчи Раççей тата тĕнче чемпионне Юрий Амелина халалланă.
Ăмăртусене Шупашкарти, Çĕнĕ Шупашкарти, Сĕнтĕрвăрри тата Вăрмар районĕсенчи спорт шкулĕсен, клубĕсен, ытти спорт организацийĕсен спортсменĕсем явăçрĕç. Вĕсем тĕрлĕ ỹсĕм çулĕпе ярăнчĕç. Ушкăнпа 80 çухрăм, уйрăмшарăн 15 çухрăмшар кайрĕç.
Ку хутĕнче те Патăрьелĕнчи ачасемпе çамрăксен "Паттăр" спорт шкулĕнче малтанхи хăнăхусене илнĕ (халĕ олимп резервĕсен çиччĕмĕш шкулне çỹреççĕ) çамрăксем çитĕнỹсемпе савăнтарчĕç. 15-18 çулхисенчен Вăрманхĕрри Шăхалĕнчи Л. Селиванов çĕнтерỹçĕ ятне тивĕçрĕ, Нăрваш Шăхалĕнчи О. Кузьмина иккĕмĕш вырăна тухрĕ. Оля хăйĕн умĕнче пыраканран 21 секунд çеç кая юлчĕ.
Спортсменсене ỹсĕм çулĕ çине тăма Раççей Федерацийĕн тава тивĕçлĕ тренерĕ В. Афанасьев хăнăхтарнă.
А. ИВАНОВА
Источник: "Авангард" (газета Батыревского района)