01 декабря 2017 г.
Çак кунсенче Шупашкарти Чăваш патшалăх ỹнер музейĕнче нумай çул пĕрле пурăнакан çемьесен республикăри "Манăн çемье - манăн тĕрек" фестивалĕ иртнĕ. Унта Амăшĕпе Ашшĕн çулталăкĕнче кĕмĕл, ахах, мерчен, изумруд, кевер туйĕсене паллă тăвакансене чысланă.
Чыслă мероприятие пирĕн районти Нăрваш Шăхалĕнчи Бородкинсен çемйи те хутшăннă. Василий Михайловичпа Александра Терентьевна пĕр сукмакпа утма пикенни кăçал 55 çул çитрĕ. Хастар та пултаруллă мăшăр общество пурнăçĕнче те ыттисемшĕн ырă тĕслĕхлĕ. Вĕсем юрă-ташăра çеç мар, спортра та маттур. Кăтартуллă мăшăр хăйсен ачисене çеç мар, мăнукĕсемпе кĕçĕн мăнукĕсене те (вĕсем 15ĕн) хăйсем пек ырă çынсем пулса ỹсме, çемье телейĕн вăрттăнлăхĕ пысăк юратура пулнине ăса хывма вĕрентеççĕ.
Источник: "Авангард" (газета Батыревского района)