18 марта 2016 г.
"Труд" ял хуçалăх кооперативĕн ферминче çулталăкне темиçе те пулма тỹр килет. Витесенче шалта та, вĕсен территорийĕнче те яланах таса, тирпейлĕ. Кунне икĕ хутчен тислĕке транспортерпа кăлараççĕ. Кивелнĕ, çĕрĕшнĕ урай хăмисене çийĕнчех улăштараççĕ. Хуралтăсене те май пур таран юсаса, çĕнетсе тăраççĕ...
_ Паяна пирĕн хуçалăхра 350 пуç ĕне-выльăх, унтан сăваканни _ 170. Пĕлтĕр 100 ĕне пуçне 85 пăру илнĕ. Çулталăк тăршшĕ- пе 764 тонна сĕт сунă, пĕр ĕне вăтамран 4494 килограмм сĕт антарнă. Светлана Шайманован кăтартăвĕ вара чи пысăкки _ 5200 килограмм. Ыттисен те тăватă пинтен иртнĕ. Çакăнта манăн Клара Васильевна Ульянова осеменатор хăйĕн ĕçне тивĕçлĕ шайра пурнăçласа пынине палăртса хăварас килет. Ĕнесем йăхасси, пăрусем илесси, сăвăм мĕнле пуласси унран нумай килет. Вăл район чысне те республика шайĕнче осеменаторсем хушшинче йĕркелекен конкурсра пĕрре мар хỹтĕленĕ, _ тет хуçалăхăн тĕп зоотехникĕ Михаил Васильев çулталăк пĕтĕмлетĕвĕпе кĕскен паллаштарса.
Кăтарту аванни выльăхсем умĕнче апат çителĕклĕ пулнинчен те нумай килет. Ахальтен мар ĕнтĕ ĕнен сĕчĕ чĕлхи çинче, теççĕ. Кашнине 30 килограмм силос, жом _ 10-15, 3-4 килограмм пусыпка параççĕ. Çавăн пекех рационта шур тăмпа тăвар та пур. Паян пĕр ĕнерен вăтамран 11 килограма яхăн сĕт сăваççĕ. Шурă шĕвеке куллен пĕр тонна та 500 килограмм ытла патшалăха сутаççĕ, унсăр пуçне çамрăк пăрусене валли хăвараççĕ тата ял çыннисем те килсе илеççĕ.
Кĕтĕве çĕнетесси те хуçалăхра яланах тĕп вырăнта пулнă. 50 пушмакпа çулталăкри 30 тынана "Чăваш Республикин ял хуçалăхĕн тава тивĕçлĕ ĕçченĕ" ята илнĕ Владимир Никитин çемйи пăхать. Никитинсем хăйсен тивĕçне яланах тĕплĕ пурнăçланине палăртрĕ М. Васильев.
Нăрваш Шăхальсен кадр ыйтăвĕпе те йывăрлăх çук. Куллен фермăналла 20 çын ытла васкать. Дояркăсем хушшинче çамрăксем те пур. Паллах, çакă шалăва вăхăтра пама тăрăшнипе те çыхăннă. Ĕне сăвакансем уйăхсерен 12 пин тенкĕрен кая илмеççĕ. Пăру пăхакансен вара кăшт пĕчĕкрех.
Çанталăк ăшăтса пынă май выльăхсене хире кăларасси пирки те шухăшлама пикеннĕ хуçалăхра. Кĕтĕве малтанхи кунсенче кĕркунне ятарласа акса хăварнă ыраш анинче çỹретĕç.
О. ПАВЛОВА
Источник: "Авангард" (газета Батыревского района)