23 января 2013 г.
Нăрваш Шăхалĕнче Чăваш Республикин тава тивĕçлĕ учителĕн Василий Михайлович Бородкин ячĕллĕ призсене çĕнсе илессипе волейбол турнирĕ вун тăххăрмĕш хут иртрĕ. Ăмăртăва çулленех чылай команда пуçтарăнать. Кăçал саккăрăн килнĕ. Турнира уçма район администрацийĕн пуçлăхĕ Н. Глухов та хутшăнчĕ. Ăмăртăва Василий Михайловичпа командăра чылай çул пĕрле вылянă И. Хитров, Р. Сафиуллов, А. Долгов, Е. Долгов, Н. Козлов юлташĕсем пуçтарăнни те кăмăллă.
Командăсене икĕ пая пайларĕç. “А” ушкăнра “Инвал” (Шупашкар), “Шимкуссы” (Тăвай), “Тойси”, “Шăхаль”, “Б”ра “Сăкăт”, “Батыревский”, “Паттăр” ФСК, “Доверие” (Шупашкар) пулчĕç. Вăййа иртнĕ çулхи çĕнтерÿçĕ командăпа “Тойси” пуçларĕç. “Инвал” ку тĕл пулура çăмăллăнах 2:0 шутпа выляса илчĕ. “Батыревский” те “Сăкăт” командăна çавăн пек шутпах çĕн-терчĕ. Тепĕр тĕл пулăва “Инвалпа” “Шимкуссы” тухрĕç. Тăвай çамрăкĕсем лайăхрах вылярĕç. “Батыревский” командăпа “Доверие” хушшинчи тупăшу та интереслĕ пулчĕ. Пирĕн ентешсем еплерех тăрăшрĕç пулин те хăнасене парăнтараймарĕç. Виççĕ-мĕш вырăншăн “Инвалпа” “Батыревский” командăсем тупăшрĕç, Шупашкарсем çĕнтерчĕç. Пĕрремĕш вырăншăн тата куçса çÿрекен кубокшăн вара хăнасем вылярĕç. Куран халăха уйрăмах “Шимкуссы” команда пултарулăхĕ килĕшрĕ. Куçса çÿрекен кубок çавсене тивĕçрĕ.
Çулленех çак тупăшура судьясен коллегийĕ вылякансене тăватă номинаципе палăртать. “Чи лайăх вылякан” ята Е. Кузьмин (“Инвал”), “Чи лайăх тапăнса вылякан” – Д. Капитонов (“Шимкуссы”), “Чи лайăх пас паракан” – Ю. Шульдяков (“Доверие”), “Чи лайăх хÿтĕлевçĕ” – С. Маков (“Батыревский”) тивĕçрĕç. Тепĕр хавхалантармалли приза “Шăхаль” командăри чи çамрăк Ю. Николаев çĕнсе илчĕ. Мала тухнă тата призлă вырăнсене йышăннă, номинацисемпе чи лайăххисем пулнă командăсемпе вылякансене асăнмалăх хаклă парнесем парса чысларĕç.
Источник: "Авангард" (газета Батыревского района)