05 марта 2014 г.
Ялти культура çурчĕн ĕçченĕсем урамри сцена çинче халăха тĕрлĕ юрăпа, кулăш-шỹтпе, аттракционсемпе кĕтсе илчĕç. Палăртнă вăхăтра ял тăрăхĕн ертỹçин çумĕ Н. Михайлова, "Труд" ял хуçалăх предприятийĕн председателĕ Н. Михайлов, хĕрарăмсен канашĕн председателĕ В. Исакова уяв ячĕпе саламларĕç, çирĕп сывлăх, телей, килĕшỹ, юрату сунчĕç. Унтан спорт ăмăртăвĕсем пуçланчĕç. Малтанах хĕрарăмсем 8 килограмлă кире пуканне инçете ывăтассипе тупăшрĕç. Арçынсен пуканĕ _ 24 килограмм. Ăна Вăрманхĕрри Шăхаль кĕрỹшĕ чи аякка печĕ. Çуна çине пĕр михĕ тырă хурса кам маларах туртса тухассине те пĕлесшĕн пулчĕç уявра. Хĕрарăмсенчен çак парнене Л. Едифанова çĕнсе илчĕ.
Малалла спорта юратакансем алă вăйне виçессипе тупăшрĕç.
Ăмăртусем пынă вăхăтрах В. Софронов хăйĕн капăрлатса кỹлнĕ урхамахĕпе хĕрарăмсене урамсем тăрăх çăварни юрри юрласа катаччи чуптарчĕ.
Йăлана кĕнĕ тепĕр ăмăртура хĕрарăмсен аттине инçете ывăтас текенсем тупăшрĕç. Парни В. Исакована тивĕçрĕ. Спортăн тепĕр енĕ вĕрен туртасси пулчĕ. Юлашкинчен пурте пĕрле хĕл мĕлкине çунтарса ячĕç.
Уяв лотерейи те кăмăллă иртрĕ.
В. БОРОДКИН
Источник: "Авангард" (газета Батыревского района)