20 июля 2013 г.
Районта тĕрлĕ сферăра ĕçлекенсем хушшинче конкурссем, ăмăртусем иртеççĕ. Ку хутĕнче вăл çамрăк специалистсемшĕн пулчĕ. Культура ĕçченĕсем "Професси тĕлĕшпе чи лайăххине" палăртрĕç. Çак ята Нăрваш Шăхалĕнчи культура аталанăвĕпе библиотека тивĕçтерĕвĕн центрĕн ертỹçи Елена Смирнова тивĕçнĕ.
Елена çак системăра 2010 çултанпа ĕçлет. Виçĕ çул хушшинче "Асамат кĕперĕ", "Утмăлтурат" фольклор ушкăнĕсем хăйсен ĕçне лайăхлатрĕç. "Çĕнĕ сасăсем", "Бабушки-сударушки" пĕрлешỹсем йĕркеленчĕç, ачасен "Фан", "Солнышко" ташă ушкăнĕсем ĕçлеççĕ. Аслисем вара "Танцуй, пока молодой" пĕрлешĕве çỹреççĕ. "Куккук" театр кружокĕ, уйрăм юрăçсен "Шăпчăксем" ушкăнĕ хăйсен пултарулăхне сцена çинче пĕрре мар кăтартнă.
Ăста алăсемпе тем те ăсталама пĕлекенсем пур ялта. Çитĕнекен ăру вĕтĕ шăрçапа ĕçлеме те кăмăллать. Çамрăксен канашĕн председателĕ пулнăран та хĕрсемпе каччăсене кашни кружока илĕртме ỹркенмест Елена Станиславовна.
Культура мероприятийĕсем сахал мар иртеççĕ ял тăрăхĕнче. Ертỹçĕ коллектива та хавхалантарса ĕçлеттерме пĕлет. Иртнĕ çул Е. Смирнова районти çамрăк культура ĕçченĕсем хушшинчи професси тĕлĕшпе чи лайăххисене палăртас тĕлĕшпе ирттернĕ конкурсра лауреат пулчĕ. Вăл тăрăшнипех каччăсемпе хĕрсем "Сывă пурнăç йĕркишĕн" пыракан акцие хутшăнса волейбол командипе районта виççĕмĕш вырăн йышăнчĕç. Минифутболпа та грамота илнĕ. Нăрваш Шăхаль ял поселенийĕн, районти мероприятисене хастар хутшăннăшăн тивĕçнĕ Хисеп грамотисем те пур унăн.
Тăрăшсан, ĕмĕтленнĕ ĕмĕтсене пурнăçа кĕртме пулать иккен.
А. ИВАНОВА
Источник: "Авангард" (газета Батыревского района)