Публикации » Маттур, Артур!

А. Раськин Вăрманхĕрри Шăхалĕнче çуралнă. Мĕн велосипед çине ларма хăнăхнăранпах ун çинчен анмасть темелле. Пиллĕкмĕш класра вĕреннĕ вăхăтра секцине çÿреме пуçларĕ. Раççей тава тивĕçлĕ тренерĕ В. Афанасьев ачан пултарулăхне хăвăрт туйрĕ. Часах Артур тĕрлĕ ăмăртура палăрма тытăнчĕ. Малтанласа район, республика, каярахпа Раççей шайĕнче иртекеннисенче малти вырăнсене йышăнма пултарчĕ. Хамăр ентеш, темиçе хут тĕнче чемпионки, Олимп вăййисен призерĕ Ирина Калентьева (Ягупова) пек тĕнчипе паллă спортсмен пулас килет унăн.

2010-2011 вĕренÿ çулĕнче Артура Раççейри паллă тренер В. Трофимов Санкт–Петербург хулинчи Олимп резервĕсен училищине вĕренме илчĕ. Унта та вăл хăйне лайăх енчен кăтартма пуçларĕ, Раççей шайĕнчи ăмăртусене хутшăнса савăнтарчĕ. Вĕсен команди ют çĕр-шывсене кайма тытăнчĕ. Пĕлтĕр Кипрта, Хорватинче, Чехинче сумлă тупăшусенче пулчĕ. Пирĕн шкул воспитанникĕ çĕр-шыв тулашĕнчи спортсменсемпе ăмăртма пултарнине кăтартрĕ. Артур маунтийбайк енĕпе малтисен ретĕнче пулса çĕн-терÿçĕ ятне тивĕçнĕ, Раççей спорт мастерĕн кандидат нормативĕсене пурнăçланă. Часах чăваш каччине “Каро-Итера” велокомандăна илеççĕ. Вĕсемпе Европăри паллă тренер Ян Славичек чех ĕçлет. Çак командăра пирĕн шкулта вĕреннĕ маунтинбайк енĕпе Раççей спорт мастерĕн кандидачĕ, Раççей пĕрлештернĕ командин членĕ М. Филиппова та пур. Кăçал Марина маунтинбайк енĕпе Европа тата тĕнче чемпионатĕнче юниоркăсен ушкăнĕнче ăмăртрĕ. Август тата сентябрь уйăхĕсенче Артур “Каро-Итера” велокомандăпа ют çĕр-шыври тĕрлĕ ăмăртура маутинбайк тата велокросс енĕсемпе тупăшрĕ. Вĕсенче пĕтĕмĕшле илсен Европа çĕр-шывĕсенчен чи вăйлă çамрăк велосипедистсем ăмăртаççĕ. Малтанласа вĕсем Поль-шăра пулнă. Артур пĕр этапĕнче çиччĕмĕш, тепĕр этапĕнче пиллĕкмĕш вырăнсене йышăннă. Кун хыççăн спортсменсем Чехине куçнă. Унта та маутинбайк енĕпе ăмăртнă. Пирĕн ентеш малтанхи этапра пĕрремĕш вырăн йышăннă, тепринче чех спортсменне темиçе çеккунд çеç выляса ярса иккĕмĕш вырăна тухнă. Кашни ăмăрту дистанцийĕнче 70е яхăн çамрăк чупнă. Спортсменсем тĕрлĕ çĕр-шывран хутшăннă.

Тепĕр ăмăрту Чехи тĕп хулинче Прагăра пулса иртнĕ. Ку хутĕнче спортсменсем велокросра тупăшнă. Пирĕн ентеш кунта та пĕрремĕш ăмăртура чемпион ятне çĕнсе илнĕ. Тепринче иккĕмĕш вырăн йышăннă.

Сентябрь уйăхĕн юлашки эрнинче Артур Сочи хулинче темиçе куна пыракан Раççей чемпионатĕнче ăнăçлă ăмăртрĕ. Пилĕк этапри ăмăртăва пĕтĕм-летнĕ хыççăн пăхăр медале тивĕçрĕ.

Çитес вăхăтра команда Чехи çĕр-шывĕнче велокросс ăмăртăвĕсене хутшăнать.