Публикации » Сăвăсене акăлчанла вуларĕç .

Районти акăлчан чĕлхине вĕрентекенсем çулсеренех тĕрлĕ мероприяти ирттерсех тăраççĕ. Иртнĕ уйăхра вĕсем уçă уроксен фестивальне йĕркеленĕччĕ. Ку хутĕнче вара Патăрьелĕнчи пĕр-ремĕш вăтам шкулта “Акăлчан чĕлхин поэзийĕ” сăвă вулакансен конкурсне йĕркелерĕç. Пурĕ 28 вĕренекен хутшăнма кăмăл турĕ унта. 9 класс ачисем хушшинче Шăнкăртамри пĕрремĕш вăтам шкулти Р.Кирпичева, Алманчăри Р.Вахитова, Ыхра Çырминчи Е.Федорова тата Патăрьелĕнчи иккĕмĕш вăтам шкулти А.Аппакова малти вырăнсене йышăнчĕç.

Вуннăмĕшсем сăввисене пĕринчен тепри лайăхрах вуларĕç. Çавăнпах тупăшу та çивĕч пулчĕ. Комисси членĕсем пĕр шухăшлăн малти вырăна Патăрьелĕнчи пĕрремĕш вăтам шкулта вĕренекен А.Туктинапа А.Кириллована пама йышăнчĕç. Ангелина сăввине вуласа çеç мар, юрласа та кăтартрĕ. Аня вара хăйĕн пултарулăхĕпе пурне те тĕлĕнтерчĕ. Иккĕмĕш вырăна Аслă Чементи вăтам шкулти М.Самделовапа Çĕньялтан килнĕ Е.Ершова пайларĕç. Виççĕмĕш вырăнта– Нăрваш Шăхаль хĕрĕ Е.Лукьянова тата Патăрьелĕнчи пĕрремĕш вăтам шкулти Ю. Думилина.

Вунпĕрмĕш класра вĕренекенсенчен каллех Патăрье-лĕнчи пĕрремĕш вăтам шкулти Д.Медведева мала тухрĕ. Иккĕмĕш вăтам шкулти Д.Мышин, Шăнкăртамри пĕрремĕш вăтам шкулти Д.Сулейманова тата Хирти Пикшикри Г. Хасянова иккĕмĕшпе виççĕмĕш вырăнсене йышăнчĕç.

Вĕрентÿ пайĕн методисчĕ А.Мифтахутдинова мала тухнисене грамотăсемпе чысларĕ. Районти акăлчан чĕлхине вĕрентекенсен ертÿçи З.Чабатова конкурса пĕтĕм-летрĕ. Пĕлтĕрхи вĕренÿ çулĕнчипе танлаштарсан ачасем сăвăсене лайăхрах, пахалăхлăрах, критерисене пăхăнса вуланине палăртрĕ. Нумайăшĕ презентаци, костюм хатĕрленĕ. Вĕренекенсем хăйсене сцена çинче тытма пĕлни, илемлĕ калаçни чăнах та савăнтарать.