|
Нăрваш Шăхалĕнчи Нина Павлова учительница çинчен мана çиччĕ илтме те, еплерех ĕçленине тăхăр хут курма та тÿр килнĕ. Нина Ивановна чăваш чĕлхипе 1970 çултанпа вĕрентет. Ĕçе вăл И. Ульянов ячĕллĕ университетăн чăваш уйрăмĕнче пĕлÿ илнĕ хыççăн пуçăннă. Малтанхи çулсенчех çамрăк вĕрентÿçĕ çитĕнекен ăру кăмăлне те, ашшĕ-амăшĕнне те хăйне май çавăрма пултарнă. Çирĕп ыйтакан учитель тăрăшулăхне пула чăваш чĕлхи ачасем хисеплекен предмет пулса тăнă.
Класс-кабинет – педагог пултарулăхĕн курăмлă енĕсенчен пĕри. Нина Ивановнăн пÿлĕмĕ вара районта кăтартулли. Кунта класс тата ун тулашĕнчи вуламалли илемлĕ литературăсăр пуçне тĕпчесе çырнă наука кĕнекисем упранаççĕ. Алă айĕнчех техника хатĕрĕсем: магнитофон, фотохрестоматисен пуххи, компьютер, слайдсен комплекчĕсем пур. Класăн хыçалти пайĕнче – ĕлĕкхи тата хальхи ал ĕç культурин экспоначĕсем. Вĕсем ахаль кăтарту хатĕрĕсем çеç мар, чăваш халăхĕн йăли-йĕркипе, ĕçĕ-хĕлĕпе паллаштаракан чăн-чăн халăх пуянлăхĕ. Курса тĕлĕнме те, ăсталакан чăвашсене ваттисене ăмсанма та пулать.
Литературăна юратса вĕрентекен, сăвă-калав çырма кăмăллакан ачасем “Шăхаль сасси” шкул хаçачĕ кăларса тăраççĕ. Калăпăшĕпе пысăках мар пулин те шухăшĕпе пуян вăл, кулленхи ĕç-хĕле аван çутатать. Нина Ивановна вара пуçаруллă, хастар ачасене хавхалантарса пырать.
... Черетлĕ урок пуçланма вăхăт çитрĕ. Коридорти шăнкăравăн уçă сасси класа чĕнет. Вуннăмĕшсем хăвăрт хăйсен вырăнĕсене вырнаçса ларчĕç. Учительница урок темипе, тĕллевĕпе паллаштарчĕ. Класра “Священная война” юрă янăраса кайрĕ. Кĕвви, сăмахĕсем чун-чĕрене çÿçентереççĕ, куç умне хăрушă вăрçă сĕмне кăларса тăратаççĕ. Вĕренекенсем пĕрин хыççăн тепри чăваш çыравçисен вăрçă çулĕнче çырнă произведенийĕсемпе паллаштараççĕ, сăнарсемпе ĕçлеççĕ, сыпăксене вулаççĕ. Ачасен пĕр ушкăнĕ “Салтак çырнă виç кĕтеслĕ çырусем” юрра шăрантарчĕ, теприсем паянхи кунччен упранакан саламсемпе паллаштарчĕç. Учитель “Салтак çырăвĕ” сăвва калама пуçласан, чылайăшĕн куçĕ шывланчĕ. Унăн йĕркисем кашни ачан чунĕ витĕр тухаççĕ. Нина Ивановна уйрăм вĕренекенсен, ушкăнсен ĕçне пĕтĕмлетсе хакларĕ, çитес урок валли киле ĕç пачĕ. Çакăнта мана Н. Павлова чăнласах та ăс-тăн паракан пултаруллă педагог пулни уççăн курăнчĕ. Вăл ачасен пĕлÿ илес туйăмĕсене çĕклес тесе пулăшу хатĕрĕсемпе питех те вырăнлă тата пĕлсе усă курать. Аслă класра вĕренекенсемпе урок-конференци, урок-диспут, урок-аукцион, урок-презентаци ирттерме кăмăллать. Вĕсенче пĕр вĕренекен те калаçăва хутшăнмасăр юлмасть. Учительница ачасен пултарулăхне малалла аталантарасси, тарăнлатасси çине те тимлĕ пăхать. Вăл тăрăшни, унăн ăсталăхĕпе пултарулăхĕ куç умĕнче, методикăна та аван пĕлет.
Н. Павлова урок ирттерессипе çеç çырлахса лармасть, класс тулашĕнчи ĕçсене те чунне парса пурнăçласа пырать. Шкулта кашни вĕренÿ çулĕнчех чăваш чĕлхипе литература эрнине ирттереççĕ. Мĕн кăна кĕртмеççĕ программăна. Фольклор уявĕ, сăвă-юрă конкурсĕ, çыравçăсемпе, искусство ĕçченĕсемпе тĕл пулни...
Районта çулленех Раиса Сарпи ячĕллĕ поэзи конкурсĕн парнисене тивĕçессишĕн фестиваль иртет. Унта та кăмăллăн хутшăнаççĕ. Вĕренекенсем район, республика шайĕнчи олимпиадăсенче, конкурссенче, конференцисенче темиçе хутчен те малти вырăнсене йышăннă. Ачасенчен чылайăшĕ куçару экзаменĕ вырăнне чăваш чĕлхипе литературине суйласа илни те педагогăн ăсталăхне çирĕплетет.
Нина Ивановна класс ертÿçи пулнă май кашни ачан кăмăлне, ăс-хакăл уйрăмлăхĕсене витĕр курса тăрать, вĕсенче хĕрхенÿлĕхпе ăшпиллĕх, тÿсĕмлĕхпе сапăрлăх туйăмĕсене аталантарса пыма тăрăшать.
|
|