25 января 2012 г.
18-мĕш хут иртрĕ çак волейбол турнирĕ. Ăмăрту парадне вунă команда йĕркеленсе тăчĕ. Спортсменсене район администрацийĕн пуçлăхĕн çумĕ, ял хуçалăх пайĕн начальникĕ М. Калмыков саламларĕ. Василий Михайловича сумлама хăй вăхăтĕнче пĕр командăра вылянă Анатолийпе Евгений Долговсем, И. Крылов, И. Хитров, Николайпа Василий Козловсем, Р. Сафиуллин та килнĕ.
Судьясен коллегийĕ командăсене виçĕ ушкăна пайларĕ. Пĕрремĕшне Шупашкарти “Инвал”, “Троллейбус”, чăваш патшалăх университечĕн “Студент”, иккĕмĕшне “Сĕнтĕрвăрри”, Нăрваш Шăхаль ял тăрăхĕн, Елчĕксен ентешлĕхĕн командисем, Комсомольски районĕнчи “Нĕркеч”, виççĕмĕшне – Патăрьел ентешлĕхĕн, “Паттăр” физкультурăпа спорт комплексĕн, “Батыревский” акционерсен хупă пĕрлешĕвĕн командисем кĕчĕç. Çак ушкăнсенче финалти вăйăсенче выляма ирĕк илес тесе çивĕч тупăшусем пулчĕç. Куракансем хăйсене килĕшекен командăсене хавхалантарса тăчĕç. Финалта выляма “Инвал”, Патăрьел, Елчĕк районĕсен ентешлĕхĕсен, “Батыревский” командăсем тивĕçрĕç. Турнирта чи вăйли вара “Инвал” пулчĕ. Иккĕмĕш вырăна Елчĕк районĕнчи ентешлĕх спортсменĕсем тухрĕç. Виççĕмĕшне Патăрьел район ентешлĕхĕн команди тивĕçрĕ. Çĕнтерÿçĕсем грамотăсемпе парнесемлĕ пулчĕç. Çулленхи турнирта тĕрлĕ номинаципе вăйăра палăракансене чыслаççĕ. “Чи лайăх вылякан” ята А. Владимиров (“Батыревский”), “Чи лайăх тапăнакан” ята Е. Кузьмин (“Инвал”), “Чи лайăх хÿтĕлекен” ята Э. Сымов (Патăрьел район ентешлĕхĕ) тата Н. Заборских (Елчĕк район ентешлĕхĕ) тивĕçрĕç.
Источник: "Авангард" (газета Батыревского района)