13 августа 2011 г.
Çурлан тăххăрмĕшĕнче икĕ хут тĕнче чемпионки, Пекинри çуллахи Олимп вăййисенче велоспортăн маунтинбайк енĕпе виççĕмĕш вырăна тухнă тава тивĕçлĕ спорт мастерĕн Ирина Калентьевăн парнисене çĕнсе илессишĕн Нăрваш Шăхалĕнче маунтинбайк енĕпе Раççей шайĕнчи ăмăрту иртрĕ. Унта республикăри спортсменсемсĕр пуçне Свердловск, Чулхула, Ленинград облаçĕсенчен, Мускавран, Казахстанран килнисем–пурĕ 15 регионтан, 170 ытла участник–хутшăнчĕç. Ăмăрту парадран, спортсменсене Нăрваш Шăхаль ял поселенийĕн пуçлăхĕ Н.Айкин саламланипе пуçланчĕ. Çавăн пекех ЧР спорт министерствин представителĕ В.Мулендеев, ачасемпе çамрăксен “Паттăр” спорт шкулĕн директорĕ А.Краснов, И.Калентьевăн ашшĕпе амăшĕ – Николай Федоровичпа Евдокия Васильевна Ягуповсем – тата ыттисем те сăмах илчĕç, ăнăçу сунчĕç. Старта малтан арçынсем тăчĕç. Кунта “Самара – Ижевск” команда чысне хÿтĕлекен Раççей спорт мастерне А.Гоголева çитекенни пулмарĕ. Иккĕмĕш вырăна унăн шăллĕ, Ленинград облаçĕн командишĕн хутшăнакан Максим тухрĕ. Виççĕмĕш вырăнта “Самара – ШВСМ–2” командăн велосипедисчĕ С.Николаев йышăнчĕ.
Хĕрарăмсенчен çĕнтерÿçĕ ятне Ленинград облаçĕнчи Е.Гоголева тивĕçрĕ. “Форвард – Удмуртия” командăри А.Коновалова – кĕмĕл, “Гримекс – Пермь” командăри Е. Мельникова бронза призерĕсем пулчĕç.
Виççĕмĕш этапра юниорсем ăмăртрĕç. Д.Жирнов (“Шупашкар– Самара” командăран), Н.Бондарук (Ленинград облаçĕ), Р.Музафаров (“Гримекс – Пермь”) малти вырăнсенче пулчĕç.
Хĕрсем хушшинче (юниоркăсем) Ирина Калентьевăн ентешне М.Филипповăна, вăл Сестрорецк хули тата Патăрьел район чысне хÿтĕленĕ, çитекенни пулмарĕ. Иккĕмĕш вырăна Маринăн командăри юлташĕ, Сестрорецкинчи Н.Ботова тухрĕ, виççĕмĕшĕнче – Шупашкарти А. Тимофеева.
Аслăрах каччăсенчен Чăваш Республикин тава тивĕçлĕ тренерĕн В. Афанасьевăн воспитанникĕ, халĕ Ленинград облаçĕнчи Сестрорецкри спорт шкулĕнче вĕренекен А. Раськин палăрчĕ. Иккĕмĕшпе виççĕмĕш вырăнсенче–Чулхула облаçĕнчи А.Луконинпа Д.Иванов.
1995-1996 çулсенче çуралнă хĕрсенчен Нăрваш Шăхалĕнчи А.Михайлова лайăх результат кăтартрĕ. Шупашкарти Т.Кузнецовăпа О.Тимофеева финиша ун хыççăн кĕчĕç.
1997-1998 çулсенче çуралнă велосипедистсенчен малти виçĕ вырăна Çĕнĕ Шупашкарти А.Чилибанов, Шупашкарти Д.Прокопьев, Çĕнĕ Шупашкарти И.Иванов тухрĕç.
Кăшт çÿлерех асăннă çулсенче кун çути курнă ачасенчен Ижевскинчи А.Шутува – пĕрремĕш, Нăрваш Шăхалĕнчи С.Михайлова – иккĕмĕш, Шупашкарти Н.Моложина виççĕмĕш вырăнсене çĕнсе илнĕ.
Чи çамрăк велосипедистсенчен ачасемпе çамрăксен “Паттăр” спорт шкулĕн спортсменĕсем П.Павловпа И.Мулендеев тата Вăрмар поселокĕнчи А.Михайлов палăрчĕç.
Источник: "Авангард" (газета Батыревского района)