21 июля 2011 г.
Ольга Терентьева Патăрьел районĕнчи Вăрманхĕрри Шăхальтен, 16 çулта. Шкулта пике çăмăл атлетикăпа кăсăкланнă, велоспорт енĕпе Валерий Афанасьев тренер патĕнче ăсталăх пухнă. Владимир Краснов хĕр ачан кăмăл çирĕплĕхне тивĕçлипе хакланă, Шупашкара йыхравланă. Ашшĕ-амăшĕ малтан хирĕç пулнă, анчах Владимир Николаевич вĕсене ÿкĕте кĕртнĕ. 7-мĕш класс пĕтерсен Ольга Шупашкарти олимп резервĕсен училищине çул тытнă. 2009-2010 çулсенче Раççейре мала тухассишĕн пынă ăмăртусенче аслă хĕрсенчен вăл чи лайăх кăтартупа савăнтарнă. Пĕлтĕрхи чемпионат Шупашкарта иртнĕ, ентешсем хавхалантарни пирĕн спортсменсене чупура вăй-хăват кÿнине аса илет Ольга. “Тĕп хуламăрти трассăна лайăх хăнăхма ĕлкĕрни те пире нумай усă кÿчĕ”, - тет вăл. Кăçал тĕнчери ăмăртура /Красногорск/ Ольга юниорсен йышĕнче мала тухнă.
Кăçал çуркунне вăл Чăваш Енри велосипедисткăсемпе ăсталăх хатĕрлевĕнче Кипрта пулнă. Çул çÿреве акă мĕнле аса илет пике: “Пирĕн кунта юрлă çанталăкчĕ, унта вара - çулла. Симĕс. Ăшă. Хитре. Çынсем акăлчанла калаçаççĕ”. Владимир Краснов тренер спортсменкăсене ют чĕлхене вĕренме хистет, ятарласа уроксем те йĕркелет.
17 çул тултарсан пикесем Европăра, тĕнчере мала тухассишĕн ăмăртма пуçлаççĕ. Çавăнпа та Ольга çак саманта чăтăмсăррăн кĕтет.
Источник: "Хыпар"