Публикации » КАШНИ КУНАХ ВĂЛ РУЛЬ УМĕНЧЕ

Чылай ял хуçалăх предприятинче халь çамрăк кадрсем çукпа пĕрех. Трактор рулĕ умĕнче те ытларах аслă çултисем. “Труд” хуçалăхăн техника паркĕнче вара ĕçре опытлисемпе пĕрлех яшсене те курма пулать.

– Хуçалăхра тăрăшакансем хушшинче çамрăксем те пулччăр тесе тăрăшатпăр. Техника паркне çĕнететпĕр, вăхăтра укçа памаллине те шутра тытатпăр. Кивĕ тракторпа никамăн та хире тухас, шалусăр ĕçлес килмест вĕт. Каччăсем питĕ маттур, мухтамалăх пур. Пĕлтĕр Олег Егоров кандидатурине Чăваш Ен Президенчĕ паракан стипендие илме тăратрăмăр. Темиçе пин çамрăк хушшинче ăна суйласа илни пире те савăнтарчĕ, – тет “Труд” ял хуçалăх предприятийĕн ертÿçи Н.Михайлов. Машинăпа трактор паркĕнче Олегпа хăйĕнпе тĕплĕнрех паллашрăмăр.

1989 çулта Нăрваш Шăхалĕнче çуралнă каччă техника çумне ачаллах “çыпçăннă”. Унăн ашшĕ Александр Георгиевич çамрăклах тракторпа ĕçленĕ. Халĕ те вăл руль умĕнче. Олега пĕчĕклех хăйĕнпе пĕрле илсе çÿренĕ, 8-мĕш класра вĕреннĕ чухне пĕрремĕш хут руль умне лартнă.

Çĕр вăйне, туртăмне, хир илемне туйнă яш Патăрьелĕнчи професси училищине вĕренме кĕрет, трактор правине илет. Практика вăхăтĕнче те тăван хуçалăхĕнчех вăл тăрăшнă, ака, вырма ирттерме пулăшнă. Хăйĕн ĕç опытне пуянлатнă. Ăста, маттур каччă кайран та хуланалла кайма шухăшламан, “Труд” ял хуçалăх предприятинех таврăннă. Кунта вара ăна хаваспах кĕтнĕ.

Малтанласа Олега МТЗ-82 маркăллă трактор шанса панă, халĕ вăл МТЗ-1221 маркăллипе çÿрет. Эпир пынă чухне “хурçă утăн” хăш-пĕр кăлтăкне юсатчĕ. Техника хăйне пăхнине юратать çав, кашни кунах тимлĕх уйăрмалла.

– Республика Президенчĕ паракан стипендие тивĕçнине пĕлсен питĕ хĕпĕртерĕм. Мана шаннăшăн пурне те тав тăвас килет, – тет Олег.

О.Егоровăн шăллĕ те халь професси училищинче ăс пухать, вăл аш-шĕпе пиччĕшĕнчен юласшăн мар.

Калаçса тăнă вăхăтра Олег тракторне юсаса пĕтерчĕ, васкавлăн руль умне ларчĕ. Çуркунне кашни минут хаклине чун-чĕрипе туйнăран хире васкарĕ.