23 апреля 2011 г.
Тĕнче уçлăхне пĕрремĕш хут Ю.А.Гагарин вĕçсе кайнăранпа 50 çул çитнине пур çĕрте те анлăн паллă туни пирки калаççĕ. Тĕрлĕ мероприяти йышĕнче спорт ăмăртăвĕсем те паллă вырăн йышăнаççĕ. Вĕсенчен пĕри – Нăрваш Шăхалĕнчи пĕтĕмĕшле пĕлÿ паракан вăтам шкулта вĕренекенсем хушшинче сĕтел çинче теннисла выляссипе ăмăртусем ирттерни.
Асăннă ăмăртăвăн пĕчĕк историйĕ те пур. Вăл 1991 çултанпа кашни çулах ака уйăхĕн 12-мĕшĕнче пулса иртет. Çак çулсем хушшинче нумай шкул ачи ку енĕпе хăйĕн пултарулăхне тĕрĕсленĕ, сывă пурнăç йĕркине хăнăхнă.
Кăçал та теннис ăмăртăвĕсем питĕ хĕрÿ, интереслĕ иртрĕç. Ăмăртăва хутшăнакансене шкул директрĕ В.Платонова саламларĕ, пурне те ăнăçусем сунчĕ, лайăх вĕренме, спортпа туслă пулма каларĕ. Малалла истори учителĕ В.Бородкин космонавтика историйĕпе паллаштарчĕ. Ун хыççăн икĕ сĕтел çинче хĕрÿ вăйăсем пуçланчĕç. Çивĕч кĕрешÿре çĕнтерÿçĕ ята тăххăрмĕш класра вĕренекен Алексей Михайлов çĕнсе илчĕ. Вăл кăçалхи вĕренÿ çулĕнче районти шкул ачисем хушшинче ирттернĕ ăмăрту çĕнтерÿçи те. Алексей пур вăйăсенче те юлташĕсене парăнтарчĕ. Иккĕмĕш вырăнта–Дмитрий Михайлов, çĕнтерÿçĕн пиччĕшĕ, вăл вуннăмĕш класра вĕренет. Теннисла выляссипе вĕсен амăшĕ Татьяна Викторовна тĕслĕх пулса тăрать. Вырăс чĕлхи учителĕ пушă вăхăт сахал пулнине пăхмасăрах спортпа питĕ туслă. Вăл теннисла выляса нумай хутчен районта çĕнтерÿçĕ ята тивĕçнĕ, район чысне республикăри ăмăртусенче ăнăçлă хÿтĕленĕ. Хисеплĕ виççĕмĕш вырăна вара Артем Раськин çĕнсе илчĕ. Тăххăрмĕш класс каччи спортпа питĕ туслă. Вăл футболла выляса, штангăна парăнтарса, ирĕклĕ майпа кĕрешсе, алă вăй виçсе районта кăна мар, республика шайĕнче те малти вырăнсене çĕнсе илнĕ.
Мала тухнисене медальсемпе Хисеп хучĕсемсĕр пуçне укçан преми парса хавхалантарчĕç, спортсменсене малашнехи пурнăçра пысăк çитĕнÿ тума ăнăçу сунчĕç.
Источник: "Авангард" (газета Батыревского района)