Публикации » Салтакра пулатăн – пурнăç куратăн

1955 çулхи авăн уйăхĕнче пире, 18 çул тултарнă çамрăксене, çар ретне тăма вăхăт çитрĕ. Ун чухне пур çамрăк та салтака кайма хатĕрччĕ. Эпир ялтан ултă çамрăк Тăван çĕр-шыва хÿтĕлеме тухса кайрăмăр. Канаша çитсен пуçласа поезд куртăмăр. Ун чухне автобуссем çÿремен, вĕсем пулман та. Çул çинче ЗИС-5 тата груз турттаракан машинăсем çеç сайра-хутра тĕл пулатчĕç. Канаша çитсен пирĕн 59-мĕш команда Хура тинĕс флотне службăна каймаллине пĕлсен питĕ савăнтăмăр. Ун чухне флотра пилĕк çул службăра тăмаллаччĕ. Пире Севастопль хулинчи вĕрентÿ центрне илсе çитерчĕç. Кунта чăваш ачисем йышлăччĕ. Çичĕ уйăх вĕренсе специальность илнĕ хыççăн карапсем çине службăна малалла тăсма ячĕç. Эпĕ Новороссийск хулине чăваш ачисенчен пĕччен лекрĕм.

Пирĕн тĕп тĕллев вăрçă вăхăтĕнче тинĕсе лартнă минăсене тасатасси пулнă. Карап çине пырсан виçĕ кунтанах тинĕ-се тухса кайрăмăр. Çапла эпир çу уйăхĕнчен пуçласа юпа уйăхĕччен тинĕсре пулнă. Феодосия хулинчен пуçласа Адлер хули таранах Хура тинĕсре çÿренĕ. Феодосия хулинче пулнă чухне тĕнчипе паллă Айвазовский художник галерейине кĕрсе курни яланлăхах асра юлчĕ. Сочи хулине кĕрсен вара пире çĕр çине те пустармарĕç. Ку хулана çар карапĕсем ятарлă хушупа анчах кĕнĕ. Пирĕн экипаж 37 çынран тăратчĕ (ÿкерчĕкре: Б. Кошкин сылтăмра (лараканни). Вăл туслă, нумай нациллĕ экипажчĕ. Салтаксем Молдавинчен, Украинăран, Азербайджанран та пурччĕ. Карап командирĕ Борис Храменков капитан лейтенант вăрçă вăхăтĕнче хăй матрос пулнă. Ырă кăмăллă, çыншăн тăрăшакан çынччĕ. Манăн килти лару-тăрăва пĕлсен çÿлти хуçасем патне тухса кĕске сроклă отпуска ячĕ. Çапах та эпĕ тăватă çул службăра пулса хамăн тивĕçе чыслăн пурнăçланăшăн, çарти çитĕнÿсемшĕн чылай Тав хутне илме тивĕçрĕм. 1959 çулта вара киле таврăнтăм. Минăсене тасатас ĕçе хастар хутшăннăшăн “ Ветеран боевых действий” хисеплĕ ята илме тивĕçрĕм.