Публикации » Александр тата Валентина Ягуповсене асăнса

Нăрваш Шăхалĕнчи культура центрĕнче ирĕклĕ майпа кĕрешес енĕпе 1993 çулта çуралнисенчен кĕçĕннисем Валентина тата Александр Ягуповсене асăнса ирттерекен турнирта тупăшрĕç. Пурĕ тăхăр команда хутшăнчĕ, çитмĕле яхăн кĕрешÿçĕ çĕнтерÿçĕ пулассишĕн вăй виçрĕç.

Парад хыççăн виçе категори-йĕсем тăрăх ăмăртусем пуçланчĕç. Кавир çине чи çăмăл виçеллисем (26 килограмм) тухрĕç. Хăйсем пĕчĕк пулсан та вĕсем питĕ çаврăнăçуллă тыткаларĕç. Çивĕч тупăшура турнирăн çĕнтерÿçи ятне Е.Чернов çĕнсе илчĕ. 29 килограмлă виçе категорийĕнче те тупăшусем питĕ те çивĕч иртрĕç. Çапах та К.Арланова çитекенни пулмарĕ. 32 килограмлă кĕрешÿçĕсем хушшинче, малтан кĕтнĕ пекех, В.Шайманов чи маттурри пулчĕ. Тепĕр виçе категорийĕнче район шайĕнчи ăмăртусен çĕнтерÿçи, Хирти Пикшикри А.Чашкин выляса илчĕ. 40 килограмлисенчен чи пултарулли Нăрваш Шăхалĕнчи вăтам шкулти А.Яковлев тата С.Мезеватов пулчĕç.

Кĕрешÿçĕсен йывăрăшĕсем ÿссе пынă май ăмăрту тата та çивĕч те интереслĕ иртрĕ. Акă, 45 килограмлă виçеллисен хушшинче турнир чемпионĕ ятне, иртнĕ çулхи пекех, Хирти Пикшик шку-лĕнчи И.Бородкин çĕнсе илчĕ. Тепĕр виçере Первомайски шкулĕнчи А.Смирнова çитекенни пулмарĕ. 55 килограмлă йывăрăшлă кĕрешÿçĕсем вуннăн финала тухассишĕн тупăшрĕç. Çивĕч ăмăртура район тата республика шайĕнчи ăмăртусен çĕнтерÿçи В.Сеприханов (Кивĕ Ахпÿрт) тухрĕ, ун хыççăн В.Андриянов пулчĕ. Район тата республика шайĕсенчи ăмăртусенче мала тухнă А.Верликова (Первомайски) та хăйĕнпе пĕр виçеллисем хушшинче парăнтаракан пулмарĕ. 65 килограмлă каччăсенчен А.Краснов (Хирти Пикшик), И.Басыров (Ыхра Çырми), И.Горшков çĕнтерÿçĕ ятне тивĕçрĕç. Спорт мастерĕн кандидачĕ А.Алеев хăйпе пĕр виçеллисенчен çăмăллăнах выляса илчĕ. Юлашки виçе категорийĕнче, 69 килограмм таяканнисем хушшинче турнир чемпионĕ ятне А.Тинюков тивĕçрĕ.

Çĕнтерÿçĕсене тата призлă вырăн йышăннă кĕрешÿçĕсене асăнмалăх парнепе диплом парса хавхалантарчĕç.