Публикации » ШĂХАЛЬ ХĕРĕСЕМ ТĕНЧЕНЕ ТĕЛĕНТЕРЕççĕ

Ирина Калентьевăпа Оля Терентьева велосипедисткăсем çинчен районта кăна мар, республикăра та пĕлмен çын çук пулĕ. Вĕсем велосипед спорчĕн маунтинбайк ăмăртăвĕн Олимп вăййисен программине кĕрекен кросс-кантри ятлинче тупăшаççĕ. Ирина икĕ хутчен тĕнче чемпионки ятне çĕнсе илнĕ, Тĕнче кубокне тивĕçнĕ, Олимп вăййисенче виççĕмĕш вырăн йышăннă, Раççей тава тивĕçлĕ спорт мастерĕ. Акă, нумаях пулмасть Итали çĕр-шывĕнче пулса иртнĕ ăмăртура Нăрваш Шăхаль хĕрĕ каллех пĕрремĕш вырăн çĕнсе илсе пурне те тĕлĕнтерчĕ.

Оля, çамрăк пулсан та (вăл Олимп резервĕсем хатĕрлекен училищĕре вуннăмĕш класра ăс пухать), спортра чылай çĕнтерÿ тунă. Вăл республикăрисенче кăна мар, Раççей шайĕнче те мала тухнă. Иртнĕ çул Раççей чемпионки ятне тата кубокне çĕнсе илнĕ. Кăçал Оля пуçласа ют çĕр-шыври ăмăртусене хутшăннă. Нумаях пулмасть Кипрта пĕрремĕш вырăна тухнă.

Иринăпа Ольăна велосипед спорчĕн вăрттăнлăхĕсене Чăваш Республикин тава тивĕçлĕ тренерĕ В.Афанасьев вĕрентнĕ. Халĕ иккĕшĕ те Раççей тава тивĕçлĕ тренерĕ В.Краснов патĕнче хăйсен пултарулăхне туптаççĕ.

Валерий Афанасьев вĕренекенĕсенчен виçĕ çамрăк велосипепедист – Мария Филиппова, Артур Раськин, Саша Яковлев – Ленинград облаçĕнчи Сестролецк хулинчи Олимп резервĕсем хатĕрлекен училищĕре ăс пухаççĕ. Вĕсем Раççей шайĕнчи ăмăртусенче пултаруллисен шутĕнче. Артурпа Мария Раççейĕн пĕрлештернĕ командине хутшăнма тивĕçнĕ. Хальхи вăхăтра Анапа хулинче тĕнче шайĕнче иртекен ăмăртусене валли хатĕрленеççĕ.