Публикации » Кÿршĕ каччи – курсант

Александр Исаков Нăрваш Шăхалĕнче, пирĕн кÿршĕре, ман куç умĕнче çитĕнчĕ. Ашшĕпе амăшĕ, Николайпа Мария, ывăлĕпе Катюша хĕрне çамрăклах ĕçпе пиçĕхтерсе, тĕрĕс воспитани парса ÿстерчĕç. Ачасем утă çулма та, çăмăл машинăпа çÿреме те хăнăхрĕç. Шкулта та лайăх паллăсемпе вĕренсе пычĕç. Саша кашни çулах “Зарница” çар вăййисене хутшăнатчĕ. Тен, шăпах çакăн чухне унăн çар çынни пулас туйăм çуралнă пуль...

Шкултан кÿршĕ ăнăçлă вĕренсе тухрĕ, “2010 çулхи чи лайăх выпускник” хĕрлĕ хăйăва тивĕçрĕ. Çар енĕпе малалла ăс пухма тĕллев лартнă каччă Воронежри пушара хирĕç кĕрешекен патшалăх службин институтне вĕренме кĕме документсем кайса пачĕ. Чăваш Республикинчен кунта çиччĕн вĕренме кăмăл тунă, анчах иккĕшĕ кĕреймен. Саша экзаменсене ăнăçлă тытса курсант пулса тăчĕ.

Кÿршĕ каччи яла хĕллехи каникула кăна таврăнчĕ. Çар тумĕпе вăл хитререх тата яштакарах курăнать. Сашăн пурнăçĕпе интересленсе вĕсем патне каçрăм, унти пурнăç пирки каласа пама ыйтрăм.

– Пире, ял ачисене, вĕренÿпе служба йĕркине хăнăхма çăмăлтарах пулчĕ. Хулара çитĕннисемшĕн йывăрлăхсем сиксе тухрĕç, дисциплинăна та пăсса айăплава кĕчĕç,– тет Саша.–Кун йĕрки кунта çирĕп, пур çĕрте те йĕркелĕхпе тимлĕх ыйтаççĕ. Дисциплинăна пăсакансене, вĕренÿре ĕлкĕрсе пырайманнисене кăларса яраççĕ. Увольненине уйăхра 2-3 хут кăлараççĕ.

Саша халĕ те хăйне сăпайлă тытать, аслă çултисене хисеплени курăнать. Каникулта та вăл ашшĕ-амăшне пулăшать, иртĕнсе çÿреме вăхăчĕ те çук. Уйрăлнă чухне мана та сывлăхпа пурăнма ыр сунса ăсатрĕ.